உவர் நீராக மாறிய ஆழ்குழாய் தண்ணீரால் கருகும் நெற்பயிர்கள்: விவசாயிகள் வேதனை

காவிரி டெல்டாவின் முக்கிய நீராதாரமான மேட்டூர் அணை ஆண்டுதோறும் ஜூன் 12-ஆம் தேதி திறக்கப்படுவது வழக்கம். அணையில் இருந்து தண்ணீர் திறக்கப்பட்டதும் டெல்டா மாவட்டங்களில் குறுவை சாகுபடி தீவிரமாக நடைபெறும். ஆனால் இந்த ஆண்டு தென்மேற்கு பருவமழை போதுமான அளவில் பெய்யாததால், கர்நாடகாவில் இருந்து மேட்டூர் அணைக்கு வரவேண்டிய காவிரி நீர் கிடைக்கவில்லை. இதனால் டெல்டா பாசனத்திற்காக இதுவரை தண்ணீர் திறக்கப்படாத நிலை ஏற்பட்டுள்ளது.காவிரி நீர் கிடைக்காததால், டெல்டா விவசாயிகள் ஆழ்குழாய் கிணறுகளை மட்டுமே நம்பி குறுவை நெல் சாகுபடியை மேற்கொண்டு வருகின்றனர். கடந்த ஆண்டு தஞ்சை மாவட்டத்தில் 3.31 லட்சம் ஏக்கரில் குறுவை சாகுபடி நடைபெற்ற நிலையில், இந்த ஆண்டு தண்ணீர் பற்றாக்குறையை கருத்தில் கொண்டு 1.50 லட்சம் ஏக்கருக்கு மட்டுமே இலக்கு நிர்ணயிக்கப்பட்டது. தற்போது சுமார் 1 லட்சம் ஏக்கரில் மட்டுமே நெல் சாகுபடி செய்யப்பட்டுள்ளதாக கூறப்படுகிறது. டெல்டா மாவட்டங்களில் மொத்தம் 3 லட்சம் ஏக்கரில் பயிரிடப்பட்டுள்ள நெற்பயிர்களுக்கு ஆழ்குழாய் நீரே பாசனமாக பயன்படுத்தப்பட்டு வருகிறது.ஆழ்குழாய் நீரை தொடர்ந்து அதிக அளவில் பயன்படுத்தி வருவதால் நிலத்தடி நீரின் தரம் பாதிக்கப்படத் தொடங்கியுள்ளது. குறிப்பாக தஞ்சை அருகே வெண்ணாற்று பாசனப் பகுதிகளான வெள்ளாம்பெரம்பூர், தென்பெரம்பூர், அள்ளூர், அழிசிகுடி, பனவெளி, விட்டலபுரம் உள்ளிட்ட பல கிராமங்களில் நிலத்தடி நீரின் உப்புத்தன்மை அதிகரித்து, குடிநீருக்கே பயன்படுத்த முடியாத அளவுக்கு உவர் நீராக மாறி வருவதாக தெரிவிக்கப்படுகிறது.இதனால் மாற்று வழியின்றி அதே உவர்நீரை வயல்களுக்கு பாய்ச்சும் நிலை ஏற்பட்டுள்ளது. இதன் விளைவாக வயல்களில் தண்ணீர் இருந்தபோதும் மண்ணின் மேற்பரப்பில் வெண்மையான உப்பு படிவங்கள் உருவாகி வருகின்றன. இந்த உப்புத்தன்மை நெற்பயிர்களின் வேர்களை நேரடியாக பாதிப்பதுடன், செடிகள் தேவையான ஊட்டச்சத்துகளை உறிஞ்ச முடியாத சூழலையும் உருவாக்கியுள்ளது.30 முதல் 45 நாட்கள் வளர்ந்துள்ள குறுவை நெற்பயிர்களின் இலைகள் முதலில் மஞ்சள் நிறமாக மாறி, பின்னர் முற்றிலும் வாடி சருகுபோல் காட்சியளிக்கின்றன. பசுமையாக இருக்க வேண்டிய வயல்கள் தற்போது வறண்ட தோற்றத்தில் காணப்படுகின்றன. குறிப்பாக வெண்ணாற்று பாசனப் பகுதிகளில் பல வயல்களில் நெற்பயிர்கள் கருகத் தொடங்கியிருப்பது விவசாயிகளிடையே கடும் கவலையை ஏற்படுத்தியுள்ளது.இந்த கிராமங்களில் மட்டும் இதுவரை சுமார் 25 சதவீத பரப்பளவில் குறுவை நெற்பயிர்கள் பாதிக்கப்பட்டுள்ளதாக கூறப்படுகிறது. தென்மேற்கு பருவமழை இனியும் போதுமான அளவில் பெய்யாவிட்டால், இந்த பாதிப்பு 50 முதல் 60 சதவீதம் வரை அதிகரிக்கும் அபாயம் இருப்பதாக விவசாயிகள் அச்சம் தெரிவிக்கின்றனர். மேலும், நிலத்தடி நீரின் உப்புத்தன்மை தொடர்ந்து உயர்ந்தால், தற்போது பாதிக்கப்படாத வயல்களும் பாதிப்புக்குள்ளாகும் என அவர்கள் எச்சரிக்கின்றனர்.உவர்நீரின் தாக்கத்தால் பாதிக்கப்பட்ட நெற்பயிர்களில் கதிர் வந்தாலும் முழுமையான மகசூல் கிடைக்காது என்று விவசாயிகள் கூறுகின்றனர். சாதாரணமாக ஒரு நெற்கொத்தில் சுமார் 300 நெல் மணிகள் உருவாகும் நிலையில், உவர்நீர் பாதிப்பால் அது 60 முதல் 80 மணிகள் வரை மட்டுமே குறையும் என தெரிவிக்கப்படுகிறது. இதனால் அறுவடைக்குப் பிறகும் விளைச்சல் மிகவும் குறைவாக இருக்கும் என்பதுடன், சந்தை விலையும் சாகுபடி செலவுகளை ஈடுகட்ட போதுமானதாக இருக்காது என்பதால் கடன் சுமை அதிகரிக்கும் அபாயம் உருவாகியுள்ளது.ஒரு ஏக்கர் குறுவை சாகுபடிக்கான விதை, நாற்று நடவு, உரம், பூச்சிக்கொல்லி மருந்து, டீசல், தொழிலாளர் கூலி மற்றும் அறுவடை இயந்திர வாடகை உள்ளிட்ட செலவுகள் தொடர்ந்து உயர்ந்து வருவதாக விவசாயிகள் தெரிவிக்கின்றனர். மகசூல் பாதிக்கப்பட்டால் முதலீட்டையே மீட்டெடுக்க முடியாத நிலை ஏற்படும் என்றும், கூட்டுறவு வங்கிகள் மற்றும் தனியார் நிதி நிறுவனங்களில் கடன் பெற்று சாகுபடி செய்துள்ள பலர் கடனை திருப்பிச் செலுத்த முடியாத சூழல் உருவாகும் என்ற அச்சமும் நிலவுகிறது.உவர்நீரால் பாதிக்கப்பட்ட பகுதிகளில் வேளாண்மைத் துறை மற்றும் வருவாய்த் துறை அதிகாரிகள் இணைந்து உடனடியாக கள ஆய்வு நடத்தி சேதத்தை மதிப்பீடு செய்து உரிய நடவடிக்கை எடுக்க வேண்டும் என்று விவசாயிகள் வலியுறுத்தியுள்ளனர்.