ஆடி முதல் வெள்ளி: தமிழகம் முழுவதும் அம்மன் கோவில்களில் பக்தர்கள் திரளான வழிபாடு

ஆடி மாதத்தின் முதல் வெள்ளிக்கிழமையை முன்னிட்டு தமிழகம் முழுவதும் உள்ள அம்மன் கோவில்களில் இன்று அதிகாலை முதலே சிறப்பு பூஜைகள் மற்றும் அபிஷேக ஆராதனைகள் நடைபெற்றன. ஆயிரக்கணக்கான பக்தர்கள், குறிப்பாக பெண்கள், பொங்கல் வைத்து அம்மனை வழிபட்டு தங்களது நேர்த்திக்கடன்களை நிறைவேற்றினர்.ஆடி மாதம் அம்மன் வழிபாட்டிற்கு மிகவும் சிறப்பான காலமாக கருதப்படுவதால், பல ஆலயங்களில் பாலபிஷேகம், தீபாராதனை, கூழ்வார்த்தல் உள்ளிட்ட ஆன்மிக நிகழ்ச்சிகள் நடைபெற்றன. செல்வ வளம், குடும்ப நலன் மற்றும் மன அமைதி வேண்டி பக்தர்கள் ஆர்வத்துடன் வழிபாட்டில் பங்கேற்றனர்.மதுரை மீனாட்சி அம்மன் கோவில், திருச்சி சமயபுரம் மாரியம்மன் கோவில், திருவானைக்காவல் அகிலாண்டேஸ்வரி ஆலயம், காஞ்சி காமாட்சி அம்மன் கோவில், திருவொற்றியூர் வடிவுடையம்மன் கோவில், மாங்காடு காமாட்சி அம்மன் கோவில், திருவேற்காடு கருமாரியம்மன் கோவில் உள்ளிட்ட முக்கிய ஆலயங்களில் அதிகாலை முதலே நீண்ட வரிசையில் பக்தர்கள் தரிசனம் செய்தனர்.பல இடங்களில் பக்தர்கள் பாலபிஷேகம், மாவிளக்கு ஏற்றுதல், பொங்கல் வைத்து வழிபாடு செய்ததுடன், குடும்ப நலன் மற்றும் வளமான வாழ்க்கைக்காக அம்மனிடம் பிரார்த்தனை செலுத்தினர்.ஆடி வெள்ளிக்கிழமையில் அம்மன் மற்றும் மகாலட்சுமியை பக்தியுடன் வழிபட்டால் செல்வ வளமும், குடும்பத்தில் நலனும் பெருகும் என்ற நம்பிக்கையால் ஆண்டுதோறும் இந்த நாளில் கோவில்களில் பக்தர்கள் கூட்டம் அதிகரிப்பது குறிப்பிடத்தக்கது.