1,400 ஏக்கர் நாற்றுகள் கருகும் அபாயம்: டெல்டா மாவட்டங்களில் பாசன தட்டுப்பாடு

டெல்டா மாவட்டங்களில் போதிய பாசன நீர் கிடைக்காததால், சுமார் 1,400 ஏக்கரில் நடவுக்காக தயார் செய்யப்பட்டுள்ள நெல் நாற்றுகள் கருகும் அபாயம் ஏற்பட்டுள்ளது. நாகப்பட்டினம், மயிலாடுதுறை, தஞ்சாவூர், திருவாரூர் உள்ளிட்ட டெல்டா மாவட்டங்களில் குறுவை மற்றும் சம்பா ஆகிய இரு பருவங்களிலும் நெல் சாகுபடி முக்கியமாக மேற்கொள்ளப்படுகிறது. இந்த பருவங்களில் விளையும் நெல்லில் பெரும்பகுதி, அரசின் உணவு தானிய திட்டத்துக்காக கொள்முதல் செய்யப்படுகிறது. இந்த ஆண்டு மேட்டூர் அணையில் போதிய நீர் இல்லாததால், குறுவை சாகுபடிக்காக ஜூன் மாதத்தில் தண்ணீர் திறக்கப்படவில்லை. சம்பா சாகுபடிக்காக கடந்த 1-ம் தேதி தண்ணீர் திறக்கப்பட்ட நிலையில், தொடர்ந்து 45 நாட்களுக்கு நீர் வழங்கப்படும் என அறிவிக்கப்பட்டது. நேற்றைய நிலவரப்படி மேட்டூர் அணையில் இருந்து வினாடிக்கு 12 ஆயிரம் கன அடி தண்ணீர் திறக்கப்படுகிறது.

இருப்பினும், டெல்டா பகுதிகளில் வறண்டு காணப்படும் நீர்வழித்தடங்களுக்கு இந்த நீர் போதுமான அளவில் சென்றடையவில்லை என கூறப்படுகிறது. ஆறுகள் மட்டுமின்றி, முக்கிய கால்வாய்களிலும் நீரோட்டம் குறைவாகவே உள்ளது. பாசனத்துக்கு தண்ணீர் கிடைக்கும் என்ற நம்பிக்கையில், டெல்டா மாவட்டங்களில் இதுவரை 22 ஆயிரம் ஏக்கரில் நெல் நடவு பணிகள் நிறைவடைந்துள்ளன. மேலும், சுமார் 1,400 ஏக்கரில் நெல் நாற்றுகள் நடவுக்காக தயாராக வைக்கப்பட்டுள்ளன. பொதுவாக ஒரு ஏக்கரில் வளர்க்கப்படும் நாற்றுகளை கொண்டு 10 முதல் 15 ஏக்கர் வரை நடவு செய்ய முடியும். அந்த வகையில், தற்போது தயாராக உள்ள 1,400 ஏக்கர் நாற்றுகள் மூலம் 14 ஆயிரம் முதல் 21 ஆயிரம் ஏக்கர் வரை நெல் நடவு செய்ய வாய்ப்புள்ளது. ஆனால், பாசன நீர் கிடைக்காத சூழலில் அவற்றை உரிய நேரத்தில் நடவு செய்ய முடியாமல், நாற்றுகள் கருகும் நிலை ஏற்பட்டுள்ளது.