தஞ்சையில் ஆகஸ்ட் 3-ல் தி.மு.க. கண்டன ஆர்ப்பாட்டம்; மு.க.ஸ்டாலின் அறிவிப்பு

தி.மு.க. தலைவர் மு.க.ஸ்டாலின் வெளியிட்டுள்ள அறிக்கையில், விவசாயிகள் எதிர்கொள்ளும் பிரச்சினைகள், காவிரி நீர்ப் பகிர்வு, மேகதாது அணை விவகாரம் உள்ளிட்ட பல்வேறு அம்சங்களில் தமிழக அரசின் செயல்பாட்டை கடுமையாக விமர்சித்துள்ளார். விவசாயிகளுக்கான பயிர்க்கடன் தள்ளுபடி குறித்து தேர்தல் வாக்குறுதியில் கூறப்பட்டபடி முழுமையாக செயல்படாமல், முதலில் ரூ.50 ஆயிரம் வரை மட்டுமே தள்ளுபடி அறிவிக்கப்பட்டதாகவும், விவசாயிகள் போராட்டத்தில் ஈடுபட்ட பின்னரே அது ரூ.75 ஆயிரமாக உயர்த்தப்பட்டதாகவும் அவர் குறிப்பிட்டுள்ளார். இருப்பினும், வாக்குறுதிகள் இன்னும் முழுமையாக நிறைவேற்றப்படவில்லை என்றும் அவர் குற்றம்சாட்டியுள்ளார். மேலும், தமிழகத்தில் ஆட்சி மாற்றம் ஏற்பட்டதிலிருந்து கர்நாடக அரசு மேகதாது அணைத் திட்டத்தை முன்னெடுப்பதில் தீவிரம் காட்டி வருவதாக அவர் தெரிவித்துள்ளார். ஜூன் 11-ஆம் தேதி கர்நாடக முதல்-மந்திரி மத்திய நிதி மந்திரி நிர்மலா சீதாராமனை சந்தித்து நிதியுதவி கோரியதாகவும், ஜூன் 12-ஆம் தேதி மத்திய ஜல்சக்தி துறை மந்திரியிடம் திட்டத்திற்கு ஒப்புதல் வழங்க வலியுறுத்தியதாகவும் அவர் சுட்டிக்காட்டியுள்ளார்.அதேபோல், ஜூலை 27-ஆம் தேதி டெல்லியில் கர்நாடகத்தைச் சேர்ந்த அனைத்து கட்சி எம்.பி.க்களுடன் ஆலோசனை நடத்தி, மேகதாது அணை கட்டுவதற்கு கீழ்ப்படை மாநிலங்களின் அனுமதி தேவையில்லை என்ற மத்திய அரசின் பதிலை மேற்கோள் காட்டி கர்நாடக முதல்-மந்திரி பேசியதாகவும், அதே நாளில் கர்நாடக அமைச்சர்கள் மற்றும் அதிகாரிகளுடன் மேகதாது தொடர்பாக தனி ஆய்வுக் கூட்டமும் நடைபெற்றதாகவும் அவர் தெரிவித்துள்ளார்.இதற்கிடையில், தமிழ்நாடு முதல்-அமைச்சர் கர்நாடகா சென்று பேச்சுவார்த்தை நடத்த உள்ளதாக முதலில் தகவல் வெளியானதாகவும், பின்னர் அது மறுக்கப்பட்டதாகவும், தற்போது சில விவகாரங்கள் குறித்து பேச்சுவார்த்தை நடத்த விருப்பம் தெரிவித்துள்ளதாக கர்நாடக முதல்-மந்திரி கூறியிருப்பதாகவும் அவர் குறிப்பிட்டுள்ளார். ஆகஸ்ட் 3-ஆம் தேதி தமிழ்நாடு முதல்-அமைச்சர் கர்நாடகா செல்லவுள்ளதாக வெளியாகும் தகவல்கள் குறித்தும் அவர் கேள்வி எழுப்பியுள்ளார்.காவிரியில் தமிழகத்துக்கான உரிய நீரை வழங்க காவிரி ஒழுங்காற்றுக் குழு உத்தரவிட்டிருந்தும், அதை நிறைவேற்ற முடியாது என்று கர்நாடக அரசு தெரிவித்துள்ளதாகவும், இதுகுறித்து தமிழக அரசு இதுவரை தெளிவான நிலைப்பாட்டை வெளிப்படுத்தவில்லை என்றும் அவர் விமர்சித்துள்ளார்.மேகதாது விவகாரத்தில் தீர்ப்பாயம் அமைக்க வேண்டும் என்று சட்டமன்றத்தில் வலியுறுத்தப்பட்ட நிலையில், கர்நாடக பயணம் அந்த நிலைப்பாட்டை பலவீனப்படுத்துமா என்ற சந்தேகமும் எழுவதாக அவர் தெரிவித்துள்ளார்.

மேலும், அரசின் நடவடிக்கைகளில் வெளிப்படைத்தன்மையும் தெளிவும் இல்லையெனவும், பல்வேறு ஊடகங்களில் வெளியாகும் தகவல்களுக்கு அரசிடம் இருந்து உரிய விளக்கம் வரவில்லை என்றும் அவர் கூறியுள்ளார்.மேலும், அனைத்துக் கட்சிக் கூட்டம் மற்றும் விவசாயச் சங்கங்களுடன் ஆலோசனை நடத்த வேண்டும் என்று பல்வேறு அரசியல் கட்சிகளும் விவசாய அமைப்புகளும் கோரிக்கை விடுத்தும், அதற்கான நடவடிக்கைகள் எதுவும் எடுக்கப்படவில்லை என்றும் அவர் குற்றம்சாட்டியுள்ளார்.கடந்த ஆண்டு 6.5 லட்சம் ஏக்கரில் குறுவை சாகுபடி நடைபெற்ற நிலையில், இந்த ஆண்டு மேட்டூர் அணை திறக்கப்படாததால் சுமார் 1.5 லட்சம் ஏக்கரில் மட்டுமே சாகுபடி நடைபெறுவதாக தகவல்கள் வெளியாகியுள்ளதாகவும், இதனால் ரூ.2,500 கோடி அளவுக்கு இழப்பு ஏற்பட்டு 14 லட்சம் விவசாயிகளின் வாழ்வாதாரம் பாதிக்கப்பட்டுள்ளதாகவும் அவர் தெரிவித்துள்ளார். இந்த நிலையில், தமிழக அரசு உடனடியாக ஏக்கருக்கு ரூ.25 ஆயிரம் குறுவை நிவாரணம் வழங்க வேண்டும், பயிர் காப்பீட்டு திட்டத்திற்கான பிரீமியம் தொகையை அரசே செலுத்த வேண்டும், சம்பா சாகுபடிக்குத் தேவையான விதை, உரம், பூச்சிக்கொல்லி உள்ளிட்ட இடுபொருட்களை மானியமாக வழங்க வேண்டும் என அவர் வலியுறுத்தியுள்ளார்.விவசாயிகளின் கோரிக்கைகளை வலியுறுத்தியும், காவிரி உரிமை தொடர்பாக அரசின் செயல்பாட்டைக் கண்டித்தும், ஆகஸ்ட் 3, 2026 காலை 10 மணிக்கு தஞ்சாவூர் பனகல் கட்டடம் அருகே தி.மு.க. இளைஞரணிச் செயலாளரும், சட்டமன்ற எதிர்க்கட்சித் தலைவருமான உதயநிதி ஸ்டாலின் தலைமையில் மாபெரும் கண்டன ஆர்ப்பாட்டம் நடைபெறும் என்று மு.க.ஸ்டாலின் அறிவித்துள்ளார்.இந்தப் போராட்டத்தில் காவிரி டெல்டா மாவட்டங்களைச் சேர்ந்த மாவட்டச் செயலாளர்கள், நிர்வாகிகள், சட்டமன்ற மற்றும் நாடாளுமன்ற உறுப்பினர்கள், உள்ளாட்சிப் பிரதிநிதிகள், கட்சியின் துணை அமைப்புகளின் நிர்வாகிகள் உள்ளிட்டோர் திரளாக பங்கேற்று விவசாயிகளுக்காக குரல் கொடுக்க வேண்டும் என்று அவர் அழைப்பு விடுத்துள்ளார்.மேலும், அனைத்து விவசாயச் சங்கங்களும், இவ்விவகாரத்தில் ஒரே கருத்துடைய அரசியல் கட்சிகளும் இந்த ஆர்ப்பாட்டத்தில் கலந்துகொண்டுவிவசாயிகளின்கோரிக்கைகள்நிறைவேறஒற்றுமையாக செயல்பட வேண்டும் என்றும் அவர் கேட்டுக்கொண்டுள்ளார்.இந்த ஆர்ப்பாட்டம் விவசாயிகளின் கோரிக்கைகளில் அரசின் கவனத்தை ஈர்க்கும் முதல் கட்ட நடவடிக்கையாகும் என்றும், அரசின் தற்போதைய அணுகுமுறை தொடர்ந்தால் மேலும் தீவிரமான போராட்டங்கள் முன்னெடுக்கப்படும் என்றும் மு.க.ஸ்டாலின் தனது அறிக்கையில் எச்சரித்துள்ளார்.