ஆஸ்திரேலிய கிரிக்கெட் அணிக்கு மற்றொரு சிறந்த வேகப்பந்து வீச்சாளர் கிடைத்துள்ளார் என்பதை 21 வயதான மஹ்லி பியர்ட்மேன் தனது அறிமுக ஒருநாள் போட்டியிலேயே நிரூபித்துள்ளார். இங்கிலாந்துக்கு எதிராக பெர்த்தில் நடைபெற்ற முதல் ஒருநாள் போட்டியில் அபாரமாகப் பந்துவீசிய அவர், எதிரணியின் பேட்டிங் வரிசையை நிலைகுலையச் செய்தார். சர்வதேச ஒருநாள் கிரிக்கெட்டில் முதல்முறையாகக் களமிறங்கிய பியர்ட்மேன், தனது முதல் ஓவரையே மெய்டனாக வீசி அசத்தினார். தொடர்ந்து இங்கிலாந்து கேப்டன் ஹாரி புரூக்கை ஆட்டமிழக்கச் செய்த அவர், அடுத்த ஓவரிலேயே அனுபவ வீரர் ஜோ ரூட்டின் விக்கெட்டையும் கைப்பற்றினார். இதற்குப் பிறகும் தனது அதிரடியான பந்துவீச்சைத் தொடர்ந்த பியர்ட்மேன், ஜோர்டன் காக்ஸ், சாம் கரன், லியாம் டாசன் ஆகியோரையும் வெளியேற்றி ஐந்து விக்கெட்டுகளைக் கைப்பற்றினார். கடைசியாக ஜோஃப்ரா ஆர்ச்சரின் விக்கெட்டையும் வீழ்த்தி, அறிமுகப் போட்டியிலேயே 6 விக்கெட்டுகளைப் பெற்று சாதனை படைத்தார். மொத்தம் 7.4 ஓவர்கள் மட்டுமே வீசிய அவர், 24 ரன்களை விட்டுக்கொடுத்து 6 விக்கெட்டுகளைக் கைப்பற்றினார். மணிக்கு 145.4 கி.மீ.
Advertisement
வேகத்தில் பந்துவீசியதுடன், பந்தை ஸ்விங் செய்யும் திறமையையும் வெளிப்படுத்தி இங்கிலாந்து பேட்ஸ்மேன்களுக்குப் பெரும் சவாலாகத் திகழ்ந்தார். இதன் விளைவாக, இங்கிலாந்து அணி 33.4 ஓவர்களில் 131 ரன்களுக்கு அனைத்து விக்கெட்டுகளையும் இழந்தது. இதற்கு முன்பு, 1988ஆம் ஆண்டு இலங்கைக்கு எதிரான தனது அறிமுக ஒருநாள் போட்டியில் ஆஸ்திரேலிய வீரர் டோனி டோட்மைட் 5 விக்கெட்டுகளை வீழ்த்தியதே அந்த அணியின் சிறந்த அறிமுகப் பந்துவீச்சு சாதனையாக இருந்தது. தற்போது 38 ஆண்டுகளுக்குப் பிறகு அந்தச் சாதனையை முறியடித்துள்ள மஹ்லி பியர்ட்மேன், 6 விக்கெட்டுகளுக்கு 24 ரன்கள் என்ற புதிய சாதனையைப் பதிவு செய்துள்ளார். ஏற்கெனவே 2024ஆம் ஆண்டு நடைபெற்ற 19 வயதுக்குட்பட்டோருக்கான உலகக் கோப்பையை வென்ற ஆஸ்திரேலிய அணியில் பியர்ட்மேன் இடம்பெற்றிருந்தார். இந்தியாவுக்கு எதிரான இறுதிப்போட்டியில் 3 விக்கெட்டுகளைக் கைப்பற்றி ஆஸ்திரேலியாவின் வெற்றிக்கு முக்கியப் பங்களித்தார். தற்போது சர்வதேச சீனியர் அணியிலும் தனது திறமையை நிரூபித்து, ஆஸ்திரேலியாவின் புதிய வேகப்பந்து வீச்சு நம்பிக்கையாக உருவெடுத்துள்ளார்.
