பிலிகுண்டுலுவில் காவிரி நீர்வரத்து அதிகரிப்பு; வினாடிக்கு 8,000 கன அடியாக உயர்ந்தது

கர்நாடகத்தில் பெய்து வரும் தொடர் மழையால் காவிரி நீர்ப்பிடிப்பு பகுதிகளில் நீர்வரத்து கணிசமாக அதிகரித்துள்ளது. இதன் எதிரொலியாக, தமிழக-கர்நாடக எல்லையான பிலிகுண்டுலுவுக்கு வரும் காவிரி நீரின் அளவு தற்போது வினாடிக்கு 8,000 கன அடியாக உயர்ந்துள்ளது.டெல்டா மாவட்டங்களின் பாசனத்துக்கு முக்கிய ஆதாரமாக இருக்கும் மேட்டூர் அணையில் நீர்மட்டம் 79 அடிக்கும் கீழ் குறைந்ததால், இந்த ஆண்டு ஜூன் 12-ஆம் தேதி வழக்கம்போல் பாசனத்துக்காக தண்ணீர் திறக்கப்படவில்லை. இதனால் குறுவை சாகுபடி கடுமையாக பாதிக்கப்பட்டது. இதையடுத்து, காவிரி ஒப்பந்தத்தின் அடிப்படையில் வழங்க வேண்டிய நீரை தமிழக அரசு கர்நாடகத்திடம் கோரியிருந்தாலும், அதற்கு ஒப்புதல் கிடைக்கவில்லை.இந்த சூழலில், தமிழ்நாட்டுக்கு தொடர்ந்து 15 நாட்களுக்கு தினமும் வினாடிக்கு 3,500 கன அடி வீதம் நீரை திறந்து விட வேண்டும் என்று காவிரி ஒழுங்காற்றுக் குழு கர்நாடக அரசுக்கு உத்தரவிட்டது. மொத்தமாக 4 டி.எம்.சி. நீரை வழங்க வேண்டும் என்றும் அந்த உத்தரவில் தெரிவிக்கப்பட்டது. பின்னர் இந்த உத்தரவை காவிரி மேலாண்மை ஆணையமும் உறுதிப்படுத்தியது.இந்நிலையில், குடகு, சிக்கமகளூரு மற்றும் கேரளத்தின் வயநாடு உள்ளிட்ட பகுதிகளில் பரவலாக கனமழை பெய்ததால் காவிரி நீர்ப்பிடிப்பு பகுதிகளில் உள்ள அணைகளுக்கு நீர்வரத்து அதிகரித்துள்ளது. குறிப்பாக கபினி அணை வேகமாக நிரம்பி வருகிறது.நேற்றைய நிலவரப்படி, கர்நாடகாவின் கே.ஆர்.எஸ். அணையில் 23.078 டி.எம்.சி., கபினி அணையில் 18.610 டி.எம்.சி., ஹாரங்கி அணையில் 7.827 டி.எம்.சி. மற்றும் ஹேமாவதி அணையில் 28.022 டி.எம்.சி. என மொத்தம் 77.537 டி.எம்.சி. நீர் இருப்பு பதிவாகியுள்ளது. இதில் பயன்பாட்டுக்குரிய நீரின் அளவு 67.517 டி.எம்.சி. என தெரிவிக்கப்பட்டுள்ளது.கபினி அணையின் நீர்ப்பிடிப்பு பகுதிகளில் கனமழை தொடர்ந்ததால், ஜூலை 31 வரை சீராக இருந்த நீர்வரத்து திடீரென வினாடிக்கு 15,500 கன அடியாக உயர்ந்தது. அணையின் பாதுகாப்பு கருதி, அங்கிருந்து காவிரி ஆற்றில் உபரிநீர் திறந்துவிடப்பட்டு வருகிறது.இந்த உபரிநீர் தமிழக எல்லையான பிலிகுண்டுலுவை வந்தடைந்துள்ளது. ஒருகட்டத்தில் கபினி அணைக்கு வினாடிக்கு 27 ஆயிரம் கன அடி நீர் வந்ததால், அணையில் இருந்து திறக்கப்பட்ட நீரின் அளவு 30 ஆயிரம் கன அடியாக உயர்த்தப்பட்டது. பின்னர் அது குறைக்கப்பட்டு தற்போது வினாடிக்கு 25 ஆயிரம் கன அடி உபரிநீர் திறக்கப்பட்டு வருகிறது.இதன் விளைவாக, பிலிகுண்டுலுவை வந்தடையும் காவிரி நீர்வரத்து தற்போது வினாடிக்கு 8,000 கன அடியாக உயர்ந்துள்ளது. இந்த நீர்வரத்து அதிகரிப்பு தமிழக விவசாயிகளுக்கு நம்பிக்கையை ஏற்படுத்தியுள்ளது.இதற்கிடையில், காவிரி ஆற்றங்கரையோர பகுதிகளில் வெள்ளப்பெருக்கு ஏற்படும் வாய்ப்பு இருப்பதால், கரையோர மக்கள் தொடர்ந்து எச்சரிக்கையுடன் இருக்க வேண்டும் என்று அதிகாரிகள் ஏற்கனவே அறிவுறுத்தியுள்ளனர்.