ராணிப்பேட்டை: பழைய இரும்புக் கிடங்கில் பயங்கர தீ விபத்து!

ராணிப்பேட்டை மாவட்டம், சிப்காட் தொழிற்பேட்டை அருகே உள்ள நெலிக்குப்பம் மோட்டூர் பகுதியில் செயல்பட்டு வரும் தனியார் பழைய இரும்புப் பொருட்கள் சேமிப்புக் கிடங்கில் இன்று (திங்கட்கிழமை) காலை திடீரென தீ விபத்து ஏற்பட்டது. தீ மளமளவெனப் பரவியதால் அப்பகுதியில் பரபரப்பு ஏற்பட்டது. கிடங்கில் சேமித்து வைக்கப்பட்டிருந்த பழைய இரும்புப் பொருட்கள் மற்றும் எளிதில் தீப்பற்றக்கூடிய கழிவுப் பொருட்களில் திடீரென தீப்பிடித்ததாகக் கூறப்படுகிறது. சிறிது நேரத்திலேயே தீ கிடங்கு முழுவதும் பரவி, கொழுந்துவிட்டு எரியத் தொடங்கியது. தீயின் வெப்பம் காரணமாக அங்கிருந்த இரும்புக் கட்டமைப்புகள் மற்றும் உலோகப் பொருட்களும் பாதிக்கப்பட்டன. மேலும், தீ விபத்து ஏற்பட்ட இடத்திலிருந்து எழுந்த கரும்புகை பல கிலோமீட்டர் தொலைவுக்குத் தெரிந்தது.

இதனால் சுற்றுவட்டாரப் பகுதிகளில் புகைமூட்டம் நிலவியதுடன், பொதுமக்களும் வாகன ஓட்டிகளும் அச்சமடைந்தனர். தகவலறிந்து சம்பவ இடத்திற்கு விரைந்து வந்த சிப்காட் மற்றும் சுற்றுவட்டாரப் பகுதிகளைச் சேர்ந்த தீயணைப்புத் துறையினர், பல தீயணைப்பு வாகனங்களின் உதவியுடன் தீயைக் கட்டுக்குள் கொண்டுவரும் பணியில் ஈடுபட்டுள்ளனர். இந்தத் தீ விபத்தில் பல லட்சம் ரூபாய் மதிப்பிலான இரும்புப் பொருட்கள் தீக்கிரையாகியுள்ளதாகத் தெரிவிக்கப்பட்டுள்ளது. தீ விபத்துக்கான காரணம் என்ன, உயிரிழப்புகள் ஏதேனும் ஏற்பட்டுள்ளனவா என்பது குறித்து சிப்காட் போலீசார் வழக்குப் பதிவு செய்து விசாரணை நடத்தி வருகின்றனர்.