விழுப்புரம் மாவட்டம், செஞ்சி அருகே வீட்டில் பெற்றோருடன் தூங்கிக்கொண்டிருந்த 7 வயது சிறுமி திடீரென மாயமான சம்பவம் அப்பகுதியில் அதிர்ச்சியையும் பரபரப்பையும் ஏற்படுத்தியுள்ளது. செஞ்சி சுற்றுவட்டாரப் பகுதியைச் சேர்ந்த தம்பதியினர், நேற்று ஞாயிற்றுக்கிழமை இரவு தங்களது 7 வயது மகளுடன் வீட்டில் தூங்கியுள்ளனர். இன்று திங்கட்கிழமை அதிகாலை எழுந்து பார்த்தபோது, அருகில் படுத்திருந்த சிறுமியைக் காணவில்லை. இதனால் அதிர்ச்சியடைந்த பெற்றோர், வீடு மற்றும் அதைச் சுற்றியுள்ள பகுதிகளில் சிறுமியைத் தேடியுள்ளனர். ஆனால், அவர் கிடைக்காததால் உடனடியாக உள்ளூர் காவல் நிலையத்தில் புகார் அளித்தனர். இதையடுத்து சம்பவ இடத்திற்குச் சென்ற போலீசார், சிறுமி மாயமானது குறித்து விசாரணையைத் தொடங்கினர்.
Advertisement
சிறுமி கடத்தப்பட்டிருக்கலாம் என்ற சந்தேகம் உள்ளிட்ட பல்வேறு கோணங்களில் விசாரணை நடைபெற்று வருகிறது. சிறுமியை விரைவாகக் கண்டுபிடிக்கும் நோக்கில் மோப்பநாயும் வரவழைக்கப்பட்டது. சிறுமி தூங்கிய இடத்தில் இருந்து மோப்பம் பிடித்துச் சென்ற நாய், அப்பகுதியில் உள்ள முக்கிய வழித்தடங்களில் ஓடியது. இதனுடன், மோப்பநாய் சென்ற திசையையும் கருத்தில் கொண்டு போலீசார் தேடுதல் பணியில் ஈடுபட்டுள்ளனர். மேலும், சுற்றுவட்டாரப் பகுதிகளில் உள்ள சிசிடிவி கேமரா காட்சிகளையும் ஆய்வு செய்து சிறுமியைத் தீவிரமாகத் தேடி வருகின்றனர்.
