தமிழ் திரையுலகில் இயக்குநர் கார்த்திக் சுப்பராஜ் இயக்கத்தில் உருவாகியுள்ள ‘டோரதி’ திரைப்படம் ரசிகர்களின் கவனத்தை ஈர்த்து வருகிறது. இப்படத்தைப் பார்த்த தயாரிப்பாளர் சவுந்தர்யா ரஜினிகாந்த், கதையின் உணர்வுப்பூர்வமான அம்சங்களையும் படக்குழுவினரின் பங்களிப்பையும் பாராட்டி சமூக வலைதளத்தில் பதிவிட்டுள்ளார். கார்த்திக் சுப்பராஜ் இயக்கியுள்ள ‘டோரதி’ திரைப்படம் கடந்த 25-ம் தேதி உலகம் முழுவதும் திரையரங்குகளில் வெளியானது. இதில் கீர்த்தி சுரேஷ் முதன்மைக் கதாபாத்திரத்தில் நடித்துள்ளார். ரிஷிகாந்த், சனந்த் உள்ளிட்டோரும் முக்கிய வேடங்களில் நடித்துள்ளனர். 1990-களின் பின்னணியில் அமைந்துள்ள இப்படம், சாதி சார்ந்த வன்முறையையும் இரு நண்பர்களின் வாழ்க்கையையும் மையமாகக் கொண்டு உருவாக்கப்பட்டுள்ளது. இளையராஜா இசையமைத்துள்ள இப்படத்திற்கு திரு ஒளிப்பதிவு செய்துள்ளார். கார்த்திக் சுப்பராஜ் இயக்கத்தில் வெளியாகும் 10-வது திரைப்படம் என்ற சிறப்பையும் ‘டோரதி’ பெற்றுள்ளது. படம் வெளியானது முதல் கீர்த்தி சுரேஷின் நடிப்பு உள்ளிட்ட பல்வேறு அம்சங்களுக்கு பாராட்டுகள் கிடைத்து வருகின்றன. நடிகர் தனுஷ், நடிகை ஸ்ரீலீலா, இயக்குநர் மணிரத்னம், இயக்குநர் தமிழரசன் பச்சமுத்து, ராஜு முருகன் உள்ளிட்ட திரையுலகப் பிரபலங்களும் படத்தைப் பாராட்டி சமூக வலைதளங்களில் தங்களது கருத்துகளைப் பகிர்ந்துள்ளனர்.
Advertisement
இந்த வரிசையில், தயாரிப்பாளர் சவுந்தர்யா ரஜினிகாந்தும் ‘டோரதி’ படக்குழுவினருக்கு வாழ்த்து தெரிவித்துள்ளார். தனது பதிவில், டோரதி கதாபாத்திரம் ஆழமான உணர்வுகளை வெளிப்படுத்துவதாகவும், கதாபாத்திரங்கள் வாழும் உலகத்துக்குள் தானும் முழுமையாகச் சென்றுவிட்டதாகவும் குறிப்பிட்டுள்ளார். மேலும், அனைவரையும் ஏற்றுக்கொண்டு சமமாக நடத்த வேண்டியதன் அவசியத்தை இப்படம் அழகாக எடுத்துரைப்பதாகப் பாராட்டியுள்ளார். தயாரிப்பாளராகத் தான் ‘கோவா’, ‘லவ்’ போன்ற படைப்புகள் மூலம் LGBTQ+ சமூகத்தைச் சார்ந்த கதைகளைக் கையாண்டிருப்பதையும் அவர் சுட்டிக்காட்டியுள்ளார். அந்தச் சமூகத்தினரை மதிப்பதில் தொடர்ந்து நம்பிக்கை கொண்டிருப்பதாகவும், அவர்களுக்கு எப்போதும் ஆதரவாக இருப்பேன் என்றும் தெரிவித்துள்ளார். ‘டோரதி’ படத்தை உருவாக்கிய தனது நண்பர் கார்த்திக் சுப்பராஜுக்கு வாழ்த்து தெரிவித்த சவுந்தர்யா ரஜினிகாந்த், சனந்தின் நடிப்பையும் வெகுவாகப் பாராட்டியுள்ளார். ரிஷிகாந்துக்கும் வாழ்த்துகளைத் தெரிவித்த அவர், இந்த ஆண்டு அவருக்கு அமைந்துள்ள விதம் மகிழ்ச்சியளிப்பதாகக் குறிப்பிட்டுள்ளார். மேலும், படக்குழுவினர் அனைவருக்கும் தனது அன்பையும் வாழ்த்துகளையும் பகிர்ந்துள்ளார்.
