நாட்டில் உள்ள சமூகநோய்க்கும் மருந்து கண்டுபிடித்து சிகிச்சை அளிக்க வேண்டும் - மு.க.ஸ்டாலின்

சென்னையில் நடைபெற்ற எழுத்தாளர் திருமாவேலன் இல்லத் திருமண விழாவில் பங்கேற்ற தி.மு.க. தலைவர் மு.க.ஸ்டாலின், மணமக்களை வாழ்த்திப் பேசினார். அப்போது, மனிதர்களின் உடல்நோய்களுக்கு மருத்துவர்கள் மருந்து கண்டுபிடித்து சிகிச்சை அளிப்பதைப் போல, நாட்டில் நிலவும் சமூகநோய்களுக்கும் தீர்வு காண வேண்டும் என்று கேட்டுக்கொண்டார்.திருமாவேலன் - ரேணுகா திருமாவேலன் தம்பதியின் மகள் டாக்டர் அமிர்தாவுக்கும், டாக்டர் பாலசுப்பிரமணியன் - சுதா பாலசுப்பிரமணியன் தம்பதியின் மகன் டாக்டர் ரவிந்திரனுக்கும் திருமணம் நடைபெற்றது. திருக்குறள் நெறியைப் பின்பற்றி நடைபெற்ற இந்த திருமணத்தில் பங்கேற்று மணமக்களை வாழ்த்துவதில் மகிழ்ச்சியடைவதாக மு.க.ஸ்டாலின் தெரிவித்தார்.தமிழர்களின் பண்பாடு மற்றும் நெறிமுறைகளை பிரதிபலிக்கும் வகையில் சுயமரியாதை திருமணங்கள் நடைபெற்று வருவதாகக் குறிப்பிட்ட அவர், இத்தகைய திருமணங்களுக்கு சட்ட அங்கீகாரம் கிடைக்காமல் இருந்த நிலை 1967-ம் ஆண்டுக்கு முன்பு இருந்ததாகக் கூறினார்.1967-ல் அண்ணா தலைமையில் தி.மு.க. ஆட்சி அமைந்தபோது, இருமொழிக் கொள்கை, சென்னை மாகாணத்துக்கு தமிழ்நாடு எனப் பெயர் சூட்டியது, சுயமரியாதை திருமணங்களுக்கு சட்டப்பூர்வ அங்கீகாரம் வழங்கியது என முக்கியமான மூன்று நடவடிக்கைகள் மேற்கொள்ளப்பட்டதாக அவர் தெரிவித்தார்.அண்ணா கொண்டு வந்த சட்டத்தின் மூலம் சுயமரியாதை திருமணங்கள் சட்டரீதியான அங்கீகாரத்தைப் பெற்றதாகவும், தற்போது நடைபெற்றுள்ள திருமணமும் அந்த சட்டத்தின் அடிப்படையிலேயே நடந்துள்ளதாகவும் மு.க.ஸ்டாலின் கூறினார். இதுபோன்ற திருமணங்களை முன்னாள் முதல்-அமைச்சர் கலைஞர், இனமான பேராசிரியர் உள்ளிட்ட திராவிட இயக்க முன்னோடிகள் ஏராளமான அளவில் நடத்தி வைத்ததாகவும் அவர் குறிப்பிட்டார்.இல்வாழ்க்கை அன்பையும் அறத்தையும் அடிப்படையாகக் கொண்டிருக்க வேண்டும் என்று திருவள்ளுவர் வலியுறுத்தியிருப்பதை சுட்டிக்காட்டிய மு.க.ஸ்டாலின், திருமாவேலனின் தந்தை புலவர் படிக்கராமு திருக்குறளைப் பரப்பும் பணியில் தொடர்ந்து ஈடுபட்டு வருவதைப் பாராட்டினார்.

அவரது பணியைப் போற்றும் வகையில் கடந்த திராவிட மாடல் ஆட்சியில் திருவள்ளுவர் விருது வழங்கி சிறப்பித்ததாகவும் தெரிவித்தார். திருமாவேலன், தனக்கு வழங்கப்படும் பணிகளை சிறப்பாக நிறைவேற்றும் திறன் கொண்டவர் என்று குறிப்பிட்ட மு.க.ஸ்டாலின், கலைஞர் தொலைக்காட்சியின் செய்திப் பிரிவு தலைவராக அவர் சிறப்பாக பணியாற்றி வருவதாகக் கூறினார். மேலும், 'முரசொலி' நாளிதழின் தலையங்கத்தை தொடர்ந்து எழுதி வரும் அவர், திராவிட இயக்கத்தின் வரலாறு, இளைஞர்களின் பங்கு மற்றும் தற்போதைய அரசியல் சூழல் உள்ளிட்டவற்றை தெளிவாக எடுத்துரைத்து வருவதாகவும் தெரிவித்தார்.திருமாவேலன் எழுதி வரும் 'முரசொலி' தலையங்கங்களை அனைவரும் தொடர்ந்து படிப்பதுடன், அவற்றை மக்களிடமும் கொண்டு சேர்க்க வேண்டும் என்று மு.க.ஸ்டாலின் கேட்டுக்கொண்டார்.மேலும், செப்டம்பர் 15-ம் தேதி சென்னையில் நடைபெற உள்ள தி.மு.க. முப்பெரும் விழாவில் தமிழறிஞர்கள், சான்றோர்கள் மற்றும் திராவிட இயக்க முன்னோடிகளுக்கு விருதுகள் வழங்கப்பட உள்ளதாக அவர் தெரிவித்தார். அந்த வகையில், இந்த ஆண்டு முரசொலி அறக்கட்டளை சார்பில் வழங்கப்படும் 'முரசொலி செல்வம் விருது' திருமாவேலனுக்கு வழங்கப்பட இருப்பதாகவும் அவர் கூறினார்.திருமணமான மணமக்கள் இருவரும் மருத்துவர்கள் என்பதை குறிப்பிட்ட மு.க.ஸ்டாலின், அவர்கள் மனிதர்களின் உடல்நோய்களுக்கு மருந்து அளிப்பதுடன், சமூகத்தில் நிலவும் 'சமூகநோய்களுக்கும்' தீர்வு காணும் வகையில் செயல்பட வேண்டும் என்று அன்புடன் கேட்டுக்கொண்டார்.தொடர்ந்து, அவர்களுக்கு பிறக்கும் குழந்தைகள் ஆண் அல்லது பெண் என எந்த பாலினமாக இருந்தாலும், அவர்களுக்கு அழகான தமிழ் பெயர்களை சூட்ட வேண்டும் என்றும் மு.க.ஸ்டாலின் வேண்டுகோள் விடுத்தார்.புரட்சிக்கவிஞர் பாரதிதாசனின் வரிகளை மேற்கோள் காட்டி, "வீட்டிற்கு விளக்காய், நாட்டிற்கு தொண்டராய்" மணமக்கள் வாழ வேண்டும் என வாழ்த்தி தனது உரையை நிறைவு செய்தார்.