திருத்தணி சுப்பிரமணியசாமி கோவிலில் ஆடி கிருத்திகை விழா:

காவடி சுமந்து திரண்ட ஆயிரக்கணக்கான பக்தர்கள்திருவள்ளூர் மாவட்டத்தில் அமைந்துள்ள திருத்தணி சுப்பிரமணியசாமி கோவிலில் ஆடி கிருத்திகை திருவிழா சிறப்பாக நடைபெற்று வருகிறது. இதையொட்டி தமிழகத்தின் பல்வேறு பகுதிகள் மட்டுமின்றி அண்டை மாநிலங்களிலிருந்தும் ஆயிரக்கணக்கான பக்தர்கள் திரண்டு வந்து முருகப்பெருமானை தரிசித்தனர்.முருகப்பெருமானின் ஆறுபடை வீடுகளில் ஐந்தாவது படைவீடாக போற்றப்படும் திருத்தணி மலைக்கோவிலில் நடைபெறும் ஆடி கிருத்திகை தெப்பத் திருவிழா பக்தி உணர்வுடன் நடைபெற்று வருகிறது. விழாவின் மூன்றாவது நாளான இன்று அதிகாலை முதலே ஏராளமான பக்தர்கள் கோவிலுக்கு வந்து வழிபாட்டில் ஈடுபட்டனர்.மூலவர் சுப்பிரமணியசாமிக்கு சிறப்பு அபிஷேகம் நடைபெற்றது. பின்னர் பலவகை மலர்களால் அலங்கரிக்கப்பட்டு, வைர மற்றும் தங்க ஆபரணங்களால் சிறப்புற அலங்கரிக்கப்பட்ட சுவாமிக்கு மகா தீபாராதனை நடைபெற்றது. இதில் பங்கேற்ற பக்தர்கள் "அரோகரா... அரோகரா..." என்ற பக்தி முழக்கத்துடன் சுவாமியை வணங்கினர்.மலைக்கோவிலில் உள்ள காவடி மண்டபத்தில் உற்சவர் முருகப்பெருமான் வெள்ளி கவச அலங்காரத்தில் பக்தர்களுக்கு அருள்பாலித்தார். இந்த சிறப்பு அலங்காரத்தை தரிசிப்பதற்காக நீண்ட வரிசையில் காத்திருந்த பக்தர்கள் பக்தி பரவசத்துடன் வழிபட்டனர்.தமிழகத்தின் பல்வேறு மாவட்டங்களிலிருந்தும், ஆந்திரப் பிரதேசம் மற்றும் கர்நாடகா உள்ளிட்ட அண்டை மாநிலங்களிலிருந்தும் பக்தர்கள் பாதயாத்திரையாக வந்தனர். பலர் காவடி எடுத்தும், பால்குடம் சுமந்தும், அலகு குத்துதல் உள்ளிட்ட நேர்த்திக்கடன்களை நிறைவேற்றியும் சுவாமியை தரிசித்தனர்.மலைக்கோவில் வளாகம் முழுவதும் பக்தர்களின் "அரோகரா" முழக்கங்கள் ஒலித்ததால் பக்தி நிறைந்த சூழல் நிலவியது. பக்தர்களின் தேவைகளை கருத்தில் கொண்டு குடிநீர், மருத்துவ உதவி, அன்னதானம் மற்றும் ஓய்விட வசதிகள் உள்ளிட்ட ஏற்பாடுகளை கோவில் நிர்வாகம் செய்திருந்தது.பக்தர்கள் பாதுகாப்பாகவும் சிரமமின்றியும் தரிசனம் செய்யும் வகையில் கோவில் நிர்வாகம், காவல்துறை மற்றும் தீயணைப்புத் துறையினர் இணைந்து கூட்ட நெரிசலை கட்டுப்படுத்தும் பணிகளையும் பாதுகாப்பு ஏற்பாடுகளையும் தீவிரப்படுத்தினர். மலைப்பாதை மற்றும் கோவில் வளாகம் முழுவதும் கண்காணிப்பு நடவடிக்கைகளும் மேற்கொள்ளப்பட்டிருந்தன.ஆடி கிருத்திகையை முன்னிட்டு திருத்தணி நகரம் முழுவதும் விழாக்கோலம் காணப்பட்டது. தொடர்ந்து அதிகளவில் பக்தர்கள் வருகை தந்ததால் கோவில் வளாகம் முழுவதும் பக்தர்கள் கூட்டம் நிரம்பியிருந்தது.