தமிழகத்தில் ரேஷன் கடைகள் வாயிலாக அரிசி குடும்ப அட்டைதாரர்களுக்கு கோதுமை மாவை பாக்கெட்டுகளில் விற்பனை செய்ய அரசு திட்டமிட்டுள்ளது. இதன்படி, ஒவ்வொரு குடும்ப அட்டைதாரருக்கும் 2 கிலோ கோதுமை மாவு வழங்கப்படலாம் என்றும், ஒரு கிலோ மாவின் விலை ரூ.15 ஆக நிர்ணயிக்கப்பட வாய்ப்புள்ளதாகவும் தகவல்கள் தெரிவிக்கின்றன. தமிழகத்தில் அரிசி குடும்ப அட்டைதாரர்களுக்கு ரேஷன் கடைகள் மூலம் மாதந்தோறும் 20 கிலோ அரிசி இலவசமாக வழங்கப்படுகிறது. விருப்பமுள்ளவர்கள் குறிப்பிட்ட அளவு அரிசிக்குப் பதிலாக கோதுமையையும் பெற்றுக்கொள்ளலாம். சென்னை உள்ளிட்ட மாவட்டத் தலைநகரங்களில் குடும்ப அட்டைதாரர்களுக்கு மாதம் அதிகபட்சமாக 10 கிலோ கோதுமை வழங்கப்படுகிறது. பிற பகுதிகளில் அதிகபட்சம் 5 கிலோ வரை கோதுமை விநியோகிக்கப்படுகிறது. இதற்காக மத்திய அரசு தமிழகத்திற்கு மாதந்தோறும் 30 ஆயிரம் டன் கோதுமையை ஒதுக்குகிறது. இதற்கிடையில், வெளிச்சந்தையில் ஒரு கிலோ கோதுமை மாவு ரூ.50 முதல் ரூ.60 வரை விற்பனை செய்யப்படுகிறது.
Advertisement
இந்த விலை காரணமாக பொருளாதாரத்தில் பின்தங்கிய மக்கள் கோதுமை மாவை வாங்குவதில் சிரமத்தை எதிர்கொள்கின்றனர். அதேசமயம், பலர் இரவு உணவாக அரிசி சாதத்துக்குப் பதிலாக சப்பாத்தியை விரும்பி சாப்பிடுகின்றனர். இந்நிலையில், குறைந்த விலையில் கோதுமை மாவை பொதுமக்களுக்கு வழங்கும் நோக்கில், ரேஷன் கடைகள் மூலம் பாக்கெட்டுகளாக விநியோகிக்க தமிழக அரசு திட்டமிட்டுள்ளது. இதற்காக மத்திய அரசிடமிருந்து கோதுமையைப் பெற்று, தனியார் மாவு ஆலைகளில் அரைத்து பாக்கெட்டுகளில் அடைத்து வழங்குவதற்கு ஒப்புதல் அளிக்கப்பட்டுள்ளதாகத் தெரிவிக்கப்பட்டுள்ளது. இந்தத் திட்டத்தின்படி, குடும்ப அட்டைதாரர் ஒருவருக்கு 2 கிலோ கோதுமை மாவு வழங்க திட்டமிடப்பட்டுள்ளது. ஒரு கிலோ மாவு ரூ.15 என்ற விலையில் விற்பனை செய்யப்படலாம் எனத் தகவல்கள் வெளியாகியுள்ளன. எனினும், விலை மற்றும் விநியோகம் தொடர்பான இறுதி விவரங்கள் உறுதிப்படுத்தப்பட வேண்டியுள்ளது.
