தமிழ்நாடு அரசு பணியாளர் தேர்வாணையம் (டிஎன்பிஎஸ்சி) நடத்தும் குரூப்-2 மற்றும் குரூப்-2ஏ பணிகளுக்கான முதல்நிலைத் தேர்வு நாளை (நவம்பர் 1) திட்டமிட்டபடி நடைபெற உள்ளது. இத்தேர்வை மாநிலம் முழுவதும் மொத்தம் 4 லட்சத்து 89 ஆயிரத்து 885 பேர் எழுதுகின்றனர். தமிழக அரசின் பல்வேறு துறைகளில் காலியாக உள்ள குரூப்-2 மற்றும் குரூப்-2ஏ பிரிவுகளைச் சேர்ந்த 846 பணியிடங்களை நிரப்பும் நோக்கில் இந்தத் தேர்வு நடத்தப்படுகிறது. இதற்காக விண்ணப்பித்துள்ள 4,89,885 பேரில், ஒரு பணியிடத்திற்கு சராசரியாக 579 பேர் என்ற அளவில் போட்டி நிலவுகிறது. மாநிலம் முழுவதும் 1,647 தேர்வு மையங்களில் தேர்வு நடைபெறுவதற்கான ஏற்பாடுகள் செய்யப்பட்டுள்ளன. சென்னையில் மட்டும் 173 மையங்களில் 51,721 பேர் தேர்வு எழுத உள்ளனர்.நாளை காலை 9.30 மணிக்குத் தொடங்கும் முதல்நிலைத் தேர்வு, நண்பகல் 12.30 மணி வரை நடைபெறும்.
Advertisement
மூன்று மணி நேரம் நடைபெறும் இத்தேர்வில் மொத்தம் 200 கொள்குறி வகை வினாக்கள் இடம்பெறும். தேர்வுக்கான மொத்த மதிப்பெண்கள் 300 ஆகும். வினாத்தாளில் பொது அறிவுப் பகுதியில் 75 கேள்விகளும், திறனறிவுப் பகுதியில் 25 கேள்விகளும், பொதுத்தமிழ் அல்லது பொது ஆங்கிலப் பகுதியில் 100 கேள்விகளும் இடம்பெறுகின்றன. தேர்வர்கள் தங்களுக்கான ஹால் டிக்கெட்டை டிஎன்பிஎஸ்சியின் அதிகாரப்பூர்வ இணையதளமான www.tnpsc.gov.in என்ற முகவரியில் இருந்து பதிவிறக்கம் செய்து கொள்ளலாம். தேர்வு நாளன்று ஹால் டிக்கெட் உள்ளிட்ட தேவையான ஆவணங்களுடன், குறிப்பிட்ட நேரத்திற்கு முன்பாகவே தேர்வு மையத்திற்குச் செல்ல வேண்டும் என விண்ணப்பதாரர்களுக்கு அறிவுறுத்தப்பட்டுள்ளது.
