சூப்பர் ஸ்டார் ரஜினிகாந்த் நடிப்பில் வெளியாகியுள்ள ‘ஜெயிலர் 2’ திரைப்படம் ரசிகர்களின் பேராதரவையும் வரவேற்பையும் பெற்று வெற்றியடைந்துள்ளது மகிழ்ச்சி அளிப்பதாக நாம் தமிழர் கட்சியின் தலைமை ஒருங்கிணைப்பாளர் சீமான் தெரிவித்துள்ளார். இதுகுறித்து அவர் தனது எக்ஸ் தளப் பதிவில், ரஜினிகாந்தின் திரைப்பயணம் மற்றும் அவரது தொடர் வெற்றிகளுக்கான காரணங்களைப் பகிர்ந்துள்ளார். திரைத்துறையில் ஐம்பது ஆண்டுகளைக் கடந்த பின்னரும், தனது முதல் படத்தில் வெளிப்படுத்திய அதே ஆர்வத்துடனும் அர்ப்பணிப்புடனும் இன்றும் ஒவ்வொரு திரைப்படத்திலும் ரஜினிகாந்த் பணியாற்றி வருவதாக சீமான் குறிப்பிட்டுள்ளார். இதுவே அவரது வெற்றிப் பயணத்திற்கும், பல தலைமுறைகளைக் கடந்தும் ரசிகர்கள் அவர் மீது கொண்டுள்ள அன்பிற்கும் முக்கியக் காரணம் என்றும் தெரிவித்துள்ளார். திரையுலகில் பெரும் புகழைப் பெற்றதுடன், நான்கு தலைமுறை இயக்குநர்களுடன் இணைந்து பணியாற்றிய அனுபவம் இருந்தபோதிலும், ஒவ்வொரு படத்தையும் புதிய முயற்சியாகக் கருதி ரஜினிகாந்த் உழைப்பதாக அவர் பாராட்டியுள்ளார்.
Advertisement
கால மாற்றங்களுக்கும், திரைப்பட உருவாக்கத்தில் ஏற்பட்டுள்ள தொழில்நுட்ப வளர்ச்சிக்கும் ஏற்ப அவரது பயணம் தொடர்வதால், ரசிகர்களுடனான அவரது அன்பான உறவு ‘ஜெயிலர் 2’ படத்தின் வெற்றியின் மூலமும் மேலும் வலுப்பெற்றுள்ளதாகக் கூறியுள்ளார். மேலும், இப்படத்தின் வெற்றிக்காக ரஜினிகாந்த், இயக்குநர் நெல்சன், இசையமைப்பாளர் அனிருத் ரவிச்சந்தர் ஆகியோருக்குச் சீமான் வாழ்த்துகளைத் தெரிவித்துள்ளார். படத்தைத் தயாரித்த சன் பிக்சர்ஸ் நிறுவனம், நடிகர்கள் மற்றும் தொழில்நுட்பக் கலைஞர்கள் உள்ளிட்ட படக்குழுவினர் அனைவருக்கும் தனது மனமார்ந்த பாராட்டுகளையும் தெரிவித்துள்ளார். இவ்வாறு சீமான் தனது எக்ஸ் தளப் பதிவில் குறிப்பிட்டுள்ளார்.
