சென்னையில் நேற்று இரவு பல்வேறு பகுதிகளில் இடைவிடாமல் கனமழை பெய்த நிலையில், கடந்த 24 மணி நேரத்தில் அதிகபட்சமாக எம்.ஜி.ஆர் நகரில் 15 செ.மீ மழை பதிவாகியுள்ளது. தென்மேற்கு வங்கக்கடல் மற்றும் அதனை ஒட்டியுள்ள தமிழ்நாடு கடலோரப் பகுதியில் இன்று குறைந்த காற்றழுத்த தாழ்வுப்பகுதி உருவாக வாய்ப்புள்ளதாக வானிலை ஆய்வு மையம் தெரிவித்துள்ளது. இதன் தாக்கத்தால் தமிழ்நாடு, புதுச்சேரி மற்றும் காரைக்கால் பகுதிகளில் வரும் 26-ம் தேதி வரை, அதாவது இன்று முதல் அடுத்த 6 நாட்களுக்கு, கனமழை முதல் மிக கனமழை வரை பெய்யக்கூடும் என அறிவிக்கப்பட்டுள்ளது. மேலும், வரும் 23-ம் தேதி வங்கக்கடலில் மற்றொரு காற்றழுத்த தாழ்வுப்பகுதி உருவாகும் வாய்ப்பும் அதிகமாக இருப்பதாக தெரிவிக்கப்பட்டுள்ளது.
Advertisement
இதற்கிடையில் சென்னை, செங்கல்பட்டு, திருவள்ளூர் உள்ளிட்ட மாவட்டங்களில் இரவு முழுவதும் பல்வேறு இடங்களில் விட்டு விட்டு கனமழை பெய்தது. தொடர்ந்து கனமழை பெய்யும் வாய்ப்பு இருப்பதாகவும் வானிலை ஆய்வு மையம் தெரிவித்துள்ளது. சென்னையில் கடந்த 24 மணி நேரத்தில் பதிவான மழை அளவில் எம்.ஜி.ஆர் நகரம் 15 செ.மீயுடன் முதலிடத்தில் உள்ளது. வடபழனியில் 14 செ.மீ மழையும், சைதாப்பேட்டை, ஆலந்தூர் மற்றும் காஞ்சி கொளப்பாக்கத்தில் தலா 13 செ.மீ மழையும் பதிவாகியுள்ளது. அதேபோல், மீனம்பாக்கம், மடிப்பாக்கம், வளசரவாக்கம், நுங்கம்பாக்கம், மதுரவாயல் மற்றும் குமரி குளச்சல் பகுதிகளில் தலா 12 செ.மீ மழை பதிவாகியுள்ளதாக தெரிவிக்கப்பட்டுள்ளது.
