நடிகர் சிலம்பரசன் நடிப்பில் உருவாகி வரும் ‘அரசன்’ திரைப்படம் குறித்த சுவாரசியமான தகவல் ஒன்று வெளியாகியுள்ளது. இப்படத்திலிருந்து சுமார் 8 நிமிடங்கள் கொண்ட பிரத்யேகக் காட்சிகளை தீபாவளி தினத்தில் வெளியிட படக்குழு திட்டமிட்டுள்ளதாகக் கூறப்படுகிறது. இதில் படத்தின் கதாபாத்திர அறிமுகங்களும், முக்கியமான காட்சிகளும் இடம்பெற வாய்ப்புள்ளதாகத் தெரிகிறது. இயக்குநர் வெற்றிமாறன் இயக்கத்தில் சிலம்பரசன் (எஸ்டிஆர்) நடிக்கும் இப்படத்தை கலைப்புலி எஸ். தாணு தயாரிக்கிறார். அனிருத் ரவிச்சந்தர் இசையமைக்கிறார். வடசென்னையை மையமாகக் கொண்டு கேங்ஸ்டர் கதைக்களத்தில் உருவாகும் இப்படத்தில் விஜய் சேதுபதி முக்கிய வேடத்தில் நடிக்கிறார். மேலும், ஆண்ட்ரியா ஜெரெமையா, பிரியங்கா மோகன், யோகி பாபு, சமுத்திரக்கனி, விக்ராந்த், கிஷோர், அமீர் உள்ளிட்ட பலரும் படத்தில் முக்கிய கதாபாத்திரங்களில் நடித்து வருகின்றனர். சுமார் நான்கு மாதங்களுக்கு முன்பு ‘அரசன்’ படத்தின் படப்பிடிப்பு திடீரென நிறுத்தப்பட்டது திரையுலகில் பரபரப்பை ஏற்படுத்தியது. பின்னர் ஏற்பட்ட பிரச்சினைகள் அனைத்தும் தீர்க்கப்பட்டதைத் தொடர்ந்து படப்பிடிப்பு மீண்டும் தொடங்கியது. தற்போது சென்னை உள்ளிட்ட பல்வேறு பகுதிகளில் இரவு, பகலாக படப்பிடிப்பு நடைபெற்று வருகிறது.
Advertisement
இதற்கிடையே, 2027-ம் ஆண்டு பொங்கல் பண்டிகைக்கு படம் வெளியாகும் என தகவல்கள் பரவி வந்தன. ஆனால், சென்னையில் அண்மையில் நடைபெற்ற கல்லூரி நிகழ்ச்சியில் பங்கேற்ற சிலம்பரசன், பொங்கல் வெளியீடு குறித்து விளக்கமளித்தார். 2027 பொங்கலுக்கு ‘அரசன்’ வெளியாகும் என ரசிகர்கள் எதிர்பார்த்தாலும், திட்டமிட்டபடி அந்தப் பண்டிகையின்போது படத்தை வெளியிட முடியாது என்றும், படத்தின் தரத்தில் எந்தவித சமரசமும் செய்ய விரும்பவில்லை என்றும் அவர் தெரிவித்தார். ரசிகர்கள் அனைவரும் பெருமைப்படும் வகையில் படம் சிறப்பாக அமையும் என்றும் நம்பிக்கை அளித்தார். இந்தச் சூழலில், தீபாவளியன்று ‘அரசன்’ படத்திலிருந்து சுமார் 8 நிமிட பிரத்யேகக் காட்சிகள் வெளியாகலாம் என்ற தகவல் ரசிகர்களிடையே உற்சாகத்தை ஏற்படுத்தியுள்ளது. அதே நாளில், இயக்குநர் கீர்த்தீஸ்வரன் இயக்கத்தில் சிலம்பரசன் நடிக்கவுள்ள அடுத்த படத்தின் அதிகாரப்பூர்வ அறிவிப்பும் வெளியாக வாய்ப்புள்ளதாகக் கூறப்படுகிறது. இந்த இரு அறிவிப்புகளும் ஒரே நாளில் வெளியாகுமா என்ற எதிர்பார்ப்பில் சிம்பு ரசிகர்கள் காத்திருக்கின்றனர்.
