நடிகர் சூர்யா நடிப்பில் உருவாகி வரும் ‘சீன்’ திரைப்படத்தின் டிரெய்லர் இன்று இரவு 7.30 மணிக்கு வெளியாகும் என படக்குழு அதிகாரப்பூர்வமாக அறிவித்துள்ளது. இதனால் டிரெய்லரைக் காண ரசிகர்கள் மிகுந்த ஆவலுடன் காத்திருக்கின்றனர். சூர்யாவின் 47-வது படமாக உருவாகும் ‘சீன்’ திரைப்படத்தை பிரபல மலையாள இயக்குநர் ஜித்து மாதவன் இயக்கி வருகிறார். இப்படத்தில் சூர்யா காவல்துறை அதிகாரியாக நடிக்கிறார். மலையாள நடிகர்களான நஸ்லேன், நஸ்ரியா நசீம், லால், ஆனந்தராஜ், ராஜ்பிரியன் உள்ளிட்ட பலர் முக்கிய கதாபாத்திரங்களில் நடித்துள்ளனர். ‘ஆவேஷம்’ படத்தின் வெற்றியைத் தொடர்ந்து ஜித்து மாதவன் இயக்கும் இப்படத்திற்கு சுஷின் ஷ்யாம் இசையமைக்கிறார். வினீத் அகஸ்டியன் ஒளிப்பதிவு பணிகளை மேற்கொள்கிறார். சுமார் ரூ.100 கோடி பட்ஜெட்டில் உருவாகும் இப்படத்தை சூர்யா - ஜோதிகாவின் 2டி என்டர்டெயின்மென்ட் மற்றும் ழகரம் ஸ்டூடியோஸ் இணைந்து தயாரிக்கின்றன.
Advertisement
சூர்யாவின் மற்றொரு தயாரிப்பு நிறுவனமான ழகரம் புரொடக்ஷன்ஸ் சார்பிலும் இப்படம் தயாராகிறது. சூர்யா நடிப்பில் வெளியான ‘கருப்பு’, ‘விஸ்வநாத் அண்ட் சன்ஸ்’ படங்களைத் தொடர்ந்து ‘சீன்’ திரைப்படம் நவம்பர் 6-ம் தேதி திரையரங்குகளில் வெளியாக உள்ளது. தீபாவளி வெளியீடாக வரவிருக்கும் இப்படத்தின் மீதான எதிர்பார்ப்பு நாளுக்கு நாள் அதிகரித்து வருகிறது. இதற்கிடையே, படத்தின் ப்ரீ ரிலீஸ் நிகழ்ச்சி துபாயில் பிரம்மாண்டமாக நடைபெற்றது. மேலும், படத்தின் இசை மற்றும் டிரெய்லர் வெளியீட்டு விழா அக்டோபர் 31-ம் தேதி மாலை 5 மணிக்கு தாம்பரத்தில் உள்ள தனியார் கல்லூரியில் நடைபெற உள்ளது. இந்நிலையில், ‘சீன்’ திரைப்படத்தின் டிரெய்லர் இன்று இரவு 7.30 மணிக்கு வெளியாகும் என்ற அறிவிப்பை தயாரிப்பு நிறுவனமான ழகரம் ஸ்டூடியோஸ் வெளியிட்டுள்ளது. இந்த அறிவிப்பு சூர்யா ரசிகர்களிடையே உற்சாகத்தை ஏற்படுத்தியுள்ளது.
