தூத்துக்குடி மாவட்டம் குலசேகரன்பட்டினம் முத்தாரம்மன் கோவிலில் நடைபெற்று வரும் தசரா திருவிழாவின் முக்கிய நிகழ்வான சூரசம்ஹாரம் இன்று (செவ்வாய்க்கிழமை) நள்ளிரவு நடைபெறுகிறது. இதையொட்டி, பக்தர்களின் பாதுகாப்பை உறுதி செய்யும் வகையில் 3,700 போலீசார் பாதுகாப்புப் பணியில் ஈடுபடுத்தப்பட்டுள்ளனர். தூத்துக்குடி மாவட்டத்தில் திருச்செந்தூர் அருகே அமைந்துள்ள குலசேகரன்பட்டினம் முத்தாரம்மன் கோவில், தசரா திருவிழாவுக்குப் புகழ்பெற்றது. ஆண்டுதோறும் நடைபெறும் இந்த விழாவில் தூத்துக்குடி, திருநெல்வேலி உள்ளிட்ட பல்வேறு பகுதிகளைச் சேர்ந்த பக்தர்கள் விரதமிருந்து, பல்வேறு வேடங்களை அணிந்து அம்மனை வழிபடுவது வழக்கம். அந்த வகையில், நடப்பாண்டுக்கான தசரா திருவிழா கடந்த 11-ம் தேதி கொடியேற்றத்துடன் தொடங்கியது. விழாவின் முக்கிய நிகழ்வான சூரசம்ஹாரம் இன்று நள்ளிரவு நடைபெற உள்ளதால், குலசேகரன்பட்டினத்தில் ஏராளமான பக்தர்கள் திரண்டு வருகின்றனர். 3,700 போலீசார் பாதுகாப்பு லட்சக்கணக்கான பக்தர்கள் வருவார்கள் என எதிர்பார்க்கப்படுவதால், விழாவையொட்டி விரிவான பாதுகாப்பு ஏற்பாடுகள் செய்யப்பட்டுள்ளன. இதுகுறித்து தூத்துக்குடி மாவட்ட காவல் கண்காணிப்பாளர் சிவபிரசாத் வெளியிட்டுள்ள செய்திக்குறிப்பில், பக்தர்கள் மற்றும் பொதுமக்களின் பாதுகாப்புக்காக நேற்று முதல் இன்று வரை கூடுதல் போலீசார் பணியில் ஈடுபடுத்தப்பட்டுள்ளதாகத் தெரிவித்துள்ளார். இதன்படி, 4 காவல் கண்காணிப்பாளர்கள் தலைமையில் 14 கூடுதல் காவல் கண்காணிப்பாளர்கள், 47 துணைக் காவல் கண்காணிப்பாளர்கள் உள்ளிட்ட மொத்தம் 3,700 போலீசார் பாதுகாப்புப் பணியில் ஈடுபடுகின்றனர்.
Advertisement
பிற மாவட்டங்களில் இருந்தும் போலீசார் வரவழைக்கப்பட்டுள்ளனர். மேலும், குற்றச் சம்பவங்களைத் தடுப்பதற்காக சாதாரண உடையில் ஆண், பெண் போலீசார் ரகசியக் கண்காணிப்பில் ஈடுபடுத்தப்பட்டுள்ளனர். பக்தர்கள் அதிகம் கூடும் பகுதிகளில் கண்காணிப்பைத் தீவிரப்படுத்தும் வகையில் 10 கண்காணிப்புக் கோபுரங்கள், சுமார் 50 போலீஸ் உதவி மையங்கள், 7 நடமாடும் கண்காணிப்பு கேமரா வாகனங்கள் மற்றும் 300-க்கும் மேற்பட்ட நிலையான கண்காணிப்பு கேமராக்கள் அமைக்கப்பட்டுள்ளன. தொழில்நுட்பக் கண்காணிப்பு தீவிரம் குலசேகரன்பட்டினத்துக்கு வரும் மூன்று முக்கியச் சாலைகளில் வாகனங்களின் பதிவு எண்களைத் துல்லியமாகக் கண்டறியும் ஏ.என்.பி.ஆர். கேமராக்கள் பொருத்தப்பட்டுள்ளன. காவல் நிலையத்தில் அமைக்கப்பட்டுள்ள கண்காணிப்புத் திரைகள் மூலம் 24 மணி நேரமும் சுழற்சி முறையில் போலீசார் கண்காணிப்புப் பணியில் ஈடுபட்டு வருகின்றனர். இதுதவிர, வான்வழிக் கண்காணிப்புக்காக 5 டிரோன் கேமராக்களும், முக அடையாளங்களைக் கண்டறியும் 5 கேமராக்களும் பயன்படுத்தப்படுகின்றன. முக அடையாளக் கண்காணிப்புக் கருவிகளில் 1,000-க்கும் மேற்பட்ட குற்றவாளிகளின் புகைப்படங்கள் பதிவேற்றம் செய்யப்பட்டுள்ளன. கண்காணிப்பு கேமராக்களின் பார்வைக்குள் வரும் பதிவேற்றப்பட்ட முகங்கள் அடையாளம் காணப்பட்டால், சம்பந்தப்பட்ட நபர்களின் நடமாட்டத்தைக் கண்காணித்து உரிய நடவடிக்கை எடுக்கவும் ஏற்பாடுகள் செய்யப்பட்டுள்ளன. சூரசம்ஹார நிகழ்வைக் காணப் பெருமளவில் பக்தர்கள் வருகை தருவார்கள் என்பதால், பாதுகாப்புப் பணிகள் தீவிரப்படுத்தப்பட்டுள்ளன.
