தனியார் பள்ளிகளுக்கு அங்கீகாரம் பெற்றுத் தருவதாகக் கூறி ரூ.400 கோடி மோசடி செய்ததாகப் பதிவான வழக்கில், முன்னாள் அமைச்சர் அன்பில் மகேஷ் நேற்று கைது செய்யப்பட்டு புழல் சிறையில் அடைக்கப்பட்டார். இந்த நடவடிக்கைக்கு திமுக தலைவர்கள் எதிர்ப்பு தெரிவித்ததுடன், இது அரசியல் பழிவாங்கும் நோக்கத்துடன் மேற்கொள்ளப்பட்ட கைது என்றும் குற்றம்சாட்டினர். இந்நிலையில், அமைச்சர் ஆதவ் அர்ஜுனா இன்று செய்தியாளர்களைச் சந்தித்து, அன்பில் மகேஷ் கைது தொடர்பாக விளக்கமளித்தார். அப்போது அவர் கூறுகையில், திமுக ஆட்சிக் காலத்தில் நெடுஞ்சாலைத் துறை மற்றும் பள்ளிகளுக்குச் சான்றிதழ்கள் வழங்கும் நடைமுறைகளில் முறைகேடுகள் நடைபெற்றுள்ளதாகக் குற்றம்சாட்டினார். அதிக வருவாய் கிடைக்கக்கூடிய துறைகளைத் தேர்ந்தெடுத்து, அவற்றின் மூலம் பணம் திரட்டுவதே நோக்கமாக இருந்ததாகவும் அவர் தெரிவித்தார். மேலும், பள்ளிக்கல்வித் துறை மற்றும் பொதுப்பணித் துறைக்கு முறையே ரூ.30 ஆயிரம் கோடி, ரூ.40 ஆயிரம் கோடி என நிதி ஒதுக்கப்படும் நிலையில், அதில் 10 சதவீதம் முறைகேடாகப் பெறப்பட்டால்கூட ஆயிரக்கணக்கான கோடி ரூபாய் கிடைக்கும் என்று அவர் குறிப்பிட்டார்.
Advertisement
பாஜகவில் இருந்து திமுகவுக்கு வந்த அரச குமாருக்கு பதவி வழங்கப்பட்டு, பின்னர் அவர் பணம் வசூலிக்கும் இடைத்தரகராகச் செயல்பட வைத்ததாகவும் ஆதவ் அர்ஜுனா குற்றம்சாட்டினார். இவ்வாறு வசூலிக்கப்பட்ட பணம் அமைச்சர்கள் மற்றும் அவர்களது உறவினர்களுக்குச் சென்றதாகக் கூறிய அவர், இந்தக் குற்றச்சாட்டுகள் அனைத்தையும் நீதிமன்றத்தில் நிரூபிப்போம் என்றும் தெரிவித்தார். மக்களிடம் உண்மை நிலவரத்தை எடுத்துரைக்க வேண்டும் என்பதே முதலமைச்சரின் விருப்பம் என்றும் அவர் கூறினார். கைது நடவடிக்கைகள் யாரையும் பழிவாங்கும் நோக்கத்தில் எடுக்கப்படவில்லை என்றும், அதற்கான தேவையும் அரசுக்கு இல்லை என்றும் தெரிவித்தார். மேலும், தேர்தலில் தோல்வியடைந்த ஒருவரைக் கைது செய்வதை அரசியல் பழிவாங்கும் நடவடிக்கையாகக் கருத முடியாது என்றும் ஆதவ் அர்ஜுனா விளக்கமளித்தார்.
