இந்தியா-ஆப்கானிஸ்தான் அணிகள் மோதும் 3 போட்டிகள் கொண்ட டி20 தொடரின் 2-வது ஆட்டம் இன்று (செவ்வாய்க்கிழமை) டெல்லியில் உள்ள அருண் ஜெட்லி ஸ்டேடியத்தில் நடைபெறுகிறது. முதல் போட்டியில் இந்திய அணி 7 விக்கெட் வித்தியாசத்தில் வெற்றி பெற்றதால், தொடரில் 1-0 என முன்னிலை வகிக்கிறது. முதல் ஆட்டத்தில் இந்திய அணியின் பந்துவீச்சு சிறப்பாக அமைந்தது. ஆப்கானிஸ்தான் அணியை 156 ரன்களுக்குள் கட்டுப்படுத்திய இந்திய அணியில் அர்ஷ்தீப் சிங் 3 விக்கெட்டுகளையும், ஜஸ்பிரித் பும்ரா ஒரு விக்கெட்டையும் கைப்பற்றினர். சுழற்பந்து வீச்சாளர்களான அக்ஷர் பட்டேல், வருண் சக்ரவர்த்தி ஆகியோரும் தலா ஒரு விக்கெட் வீழ்த்தினர். காயம் காரணமாக ஹர்திக் பாண்ட்யா அணியில் இடம்பெறாத நிலையில், 5-வது பவுலருக்கான இடத்தை நிரப்ப ஷிவம் துபே, நிதிஷ் குமார் ரெட்டி, அபிஷேக் ஷர்மா ஆகிய ஆல்-ரவுண்டர்கள் பயன்படுத்தப்பட்டனர். ஆனால், எதிர்பார்த்த அளவுக்கு அவர்களிடம் இருந்து பந்துவீச்சில் பலன் கிடைக்கவில்லை. எனவே, 5-வது பவுலர் பிரச்சினைக்கு இந்திய அணி விரைவில் தீர்வு காண வேண்டிய நிலை ஏற்பட்டுள்ளது. இதற்கிடையில் சுழற்பந்து வீச்சாளர் வருண் சக்ரவர்த்தி மீண்டும் காயம் அடைந்துள்ளார். இதனால் எஞ்சிய தொடரில் இருந்து அவர் விலகியுள்ளார். மேலும், ஆசிய விளையாட்டு போட்டியில் அவர் பங்கேற்பதும் சந்தேகமாகியுள்ளது. பேட்டிங்கில் அபிஷேக் ஷர்மா 82 ரன்களும், இஷான் கிஷன் 42 ரன்களும் விளாசி அணியின் வெற்றியை எளிதாக்கினர்.
Advertisement
இந்திய அணி 13.4 ஓவர்களிலேயே இலக்கை எட்டியது. தொடக்க வீரர் சஞ்சு சாம்சன் 10 ரன்களில் ஆட்டமிழந்தது ஏமாற்றமாக அமைந்தது. டி20 உலகக் கோப்பைக்கு பிறகும் அவரது ஆட்டத்தில் எதிர்பார்த்த முன்னேற்றம் ஏற்படவில்லை. 15 வயதான அதிரடி வீரர் வைபவ் சூர்யவன்ஷி வாய்ப்புக்காக காத்திருப்பதால், சஞ்சு சாம்சன் தனது இடத்தை தக்கவைக்க சிறப்பாக செயல்பட வேண்டிய கட்டாயத்தில் உள்ளார். முதல் போட்டியில் ஆப்கானிஸ்தான் அணியின் பேட்டிங் மற்றும் பந்துவீச்சு எதிர்பார்த்த அளவுக்கு அமையவில்லை. 7 ஓவர்களில் 43 ரன்களுக்குள் 5 விக்கெட்டுகளை இழந்து அந்த அணி தடுமாறியது. பின்னர் அஸ்மத்துல்லா ஒமர்ஜாய் 64 ரன்களும், முகமது நபி 33 ரன்களும் சேர்த்து அணியை ஓரளவு மீட்டனர். பந்துவீச்சிலும் இவர்கள் இருவரே குறிப்பிடத்தக்க பங்களிப்பை வழங்கினர். தொடரை தக்கவைக்க ஆப்கானிஸ்தான் அணிக்கு இன்றைய போட்டி மிகவும் முக்கியமானதாகும். இந்த ஆட்டத்திலும் தோல்வியடைந்தால் தொடரை இழக்க நேரிடும். எனவே, முதல் போட்டியில் செய்த தவறுகளை சரிசெய்து, புதிய வியூகத்துடன் அந்த அணி களமிறங்கும் என எதிர்பார்க்கப்படுகிறது. மறுபுறம், சர்வதேச கிரிக்கெட்டில் ஆப்கானிஸ்தானிடம் இதுவரை தோல்வியடையாத இந்திய அணி, தனது ஆதிக்கத்தை தொடர்ந்து தொடரை கைப்பற்றும் முனைப்பில் உள்ளது. இதனால் இன்றைய போட்டியில் பரபரப்புக்கு பஞ்சம் இருக்காது.
