இந்திய கிரிக்கெட் அணி அடுத்த ஆண்டு (2027) ஜனவரி மாதம் வங்கதேசத்துக்குச் சுற்றுப்பயணம் மேற்கொள்ள வாய்ப்புள்ளதாகத் தகவல்கள் வெளியாகியுள்ளன. இந்தத் தொடரில் இரு அணிகளும் தலா 3 ஒருநாள் போட்டிகள் மற்றும் 3 டி20 போட்டிகளில் மோதத் திட்டமிடப்பட்டுள்ளதாகக் கூறப்படுகிறது. இதற்கான ஆரம்பகட்டப் பேச்சுவார்த்தைகள் இந்தியா மற்றும் வங்கதேச கிரிக்கெட் வாரியங்களுக்கு இடையே சாதகமான நிலையில் நடைபெற்று வருவதாகத் தெரிகிறது. குறிப்பாக, ஜனவரி முதல் வாரத்தில் போட்டிகளை நடத்துவது குறித்து ஆலோசிக்கப்பட்டு வருகிறது.
Advertisement
எனினும், இந்திய அரசின் ஒப்புதல் கிடைத்த பின்னரே இந்தச் சுற்றுப்பயணம் இறுதி செய்யப்படும். இரு நாடுகளுக்கும் இடையே நிலவி வரும் அரசியல் மற்றும் தூதரக ரீதியிலான சிக்கல்களால், மத்திய அரசின் அனுமதி முக்கியத்துவம் பெற்றுள்ளது. இதற்கிடையே, இந்தத் தொடர் குறித்து இந்திய கிரிக்கெட் கட்டுப்பாட்டு வாரியமான பிசிசிஐ மற்றும் வங்கதேச கிரிக்கெட் வாரியம் ஆகியவை இதுவரை அதிகாரப்பூர்வ அறிவிப்பு எதையும் வெளியிடவில்லை.
