தீபாவளி பண்டிகையை முன்னிட்டு, நாடு முழுவதும் உள்ள சுமார் 11.5 லட்சம் ரெயில்வே ஊழியர்களுக்கு 78 நாட்கள் ஊதியத்துக்குச் சமமான போனஸ் வழங்க மத்திய அமைச்சரவை ஒப்புதல் அளித்துள்ளது. இதற்காக மொத்தம் ரூ.2,009 கோடி செலவிடப்படும் என ரெயில்வே அமைச்சர் அஸ்வினி வைஷ்ணவ் தெரிவித்துள்ளார். இந்த போனஸ் திட்டத்தின் கீழ், தகுதி பெற்ற ரெயில்வே ஊழியர்கள் பயன்பெற உள்ளனர். குறிப்பாக, தண்டவாளப் பராமரிப்புப் பணியாளர்கள், லோகோ பைலட்டுகள், நிலைய மேலாளர்கள் மற்றும் தொழில்நுட்பப் பிரிவுகளில் பணியாற்றுவோர் உள்ளிட்ட பல்வேறு தரப்பினருக்கு இந்தத் தொகை வழங்கப்பட உள்ளது.
Advertisement
மேலும், ரெயில்வே துறையில் தற்போது 1.65 லட்சம் பணியிடங்கள் தேவைப்படுவதாகவும், 2014-ம் ஆண்டுக்குப் பிறகு சுமார் 5.5 லட்சம் வேலைவாய்ப்புகள் உருவாக்கப்பட்டுள்ளதாகவும் அஸ்வினி வைஷ்ணவ் கூறியுள்ளார். வரும் நவம்பர் 5-ம் தேதி தீபாவளி கொண்டாடப்பட உள்ள நிலையில், ரெயில்வே ஊழியர்களுக்கு போனஸ் வழங்கும் அறிவிப்பு வெளியாகியுள்ளது. கடந்த ஆண்டும் தகுதியான ரெயில்வே ஊழியர்களுக்கு 78 நாட்கள் ஊதியத்துக்கு இணையான போனஸ் அறிவிக்கப்பட்டது குறிப்பிடத்தக்கது.
