மதுரையில் பைக்கில் சென்ற இரு இளைஞர்களை காரில் துரத்திச் சென்று, வாகனத்தால் மோதி கீழே தள்ளிய கும்பல், அவர்களை அரிவாள் உள்ளிட்ட ஆயுதங்களால் தாக்கியுள்ளது. இந்தக் கொடூரத் தாக்குதலில் சந்தோஷ்குமார் உயிரிழந்த நிலையில், தினேஷ் படுகாயமடைந்து மருத்துவமனையில் சிகிச்சை பெற்று வருகிறார். மதுரை மாவட்டம் விராதனூர் பகுதியில் உள்ள சத்யாநகர் அருகே நேற்று நள்ளிரவு தினேஷ், சந்தோஷ்குமார் ஆகிய இருவரும் பைக்கில் சென்று கொண்டிருந்தனர். அப்போது காரில் வந்த மர்ம கும்பல், அவர்கள் சென்ற பைக்கைப் பின்தொடர்ந்து துரத்தியுள்ளது. சாலையில் வேகமாகச் சென்று கொண்டிருந்த பைக் மீது காரை மோதச் செய்ததில், நிலைதடுமாறிய இரு இளைஞர்களும் சாலையில் விழுந்தனர். இதையடுத்து காரில் இருந்து கத்தி, அரிவாள் உள்ளிட்ட பயங்கர ஆயுதங்களுடன் இறங்கிய கும்பல், இருவரையும் சரமாரியாக வெட்டித் தாக்கிவிட்டு அங்கிருந்து தப்பிச் சென்றுள்ளது. இந்தத் தாக்குதலில் பலத்த காயமடைந்த சந்தோஷ்குமார் சம்பவ இடத்திலேயே ரத்த வெள்ளத்தில் உயிரிழந்தார்.
Advertisement
மற்றொரு இளைஞரான தினேஷ், உயிருக்கு ஆபத்தான நிலையில் உயிருக்குப் போராடிக் கொண்டிருந்தார். தகவல் அறிந்து சம்பவ இடத்துக்கு விரைந்த போலீசார், படுகாயமடைந்த தினேஷை மீட்டு மதுரை ராஜாஜி அரசு மருத்துவமனைக்கு அனுப்பி வைத்தனர். அங்கு அவருக்குத் தீவிர சிகிச்சை அளிக்கப்பட்டு வருகிறது. உயிரிழந்த சந்தோஷ்குமாரின் உடலைக் கைப்பற்றிய போலீசார், பிரேதப் பரிசோதனைக்காக அனுப்பி வைத்தனர். இதுதொடர்பாக வழக்குப்பதிவு செய்துள்ள போலீசார், தாக்குதலில் ஈடுபட்டுவிட்டுத் தப்பியோடிய மர்ம கும்பலைத் தீவிரமாகத் தேடி வருகின்றனர். இந்தக் கொலை முன்விரோதம் காரணமாக நடந்ததா அல்லது வேறு ஏதேனும் பின்னணி உள்ளதா என்பது குறித்தும் விசாரணை மேற்கொண்டு வருகின்றனர். மதுரையில் திரைப்படப் பாணியில் பைக்கில் சென்ற இளைஞர்களைக் காரில் துரத்தி, ஒருவர் கொலை செய்யப்பட்ட சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.
