முதல்-அமைச்சர் விஜய் சரளமாக ஆங்கிலம் பேசுகிறார்; மகிழ்ச்சி - ப.சிதம்பரம்

சென்னை ஐ.ஐ.டி. வளாகத்தில் நேற்று நடைபெற்ற நிகழ்ச்சியில், தமிழகத்துக்கு மத்திய அரசு சார்பில் பல்வேறு நலத்திட்டங்களைத் தொடங்கி வைக்கும் நிகழ்வில் பிரதமர் மோடி பங்கேற்றார். இந்த நிகழ்ச்சியில் தமிழக முதல்-அமைச்சர் விஜய் ஆங்கிலத்தில் உரையாற்றினார். அப்போது பேசிய விஜய், இந்தியாவின் பொருளாதார வளர்ச்சி, சமூக முன்னேற்றம் மற்றும் பண்பாட்டுச் சிறப்பில் தமிழகம் தொடர்ந்து முக்கியப் பங்காற்றி வருவதாகக் குறிப்பிட்டார். மேலும், மத்திய அரசும் மாநில அரசும் இணைந்து செயல்படும்போது, அதன் பயன்கள் மக்களின் அன்றாட வாழ்க்கையில் நேரடியாகத் தெரிய வேண்டும் என்பதே தங்களது அணுகுமுறை என்றும் தெரிவித்தார். விஜய்யின் ஆங்கிலப் பேச்சுக்கு ப.சிதம்பரம் பாராட்டு** விஜய்யின் ஆங்கில உரை குறித்து காங்கிரஸ் மூத்த தலைவர் ப.சிதம்பரம் தனது எக்ஸ் தளப் பதிவில் பாராட்டு தெரிவித்துள்ளார். தமிழக அரசு இருமொழிக் கொள்கையை வலியுறுத்தி வரும் நிலையில், முதல்-அமைச்சர் விஜய் ஆங்கிலத்தில் பேசியதைத் தான் முதன்முறையாகக் கேட்டதாகக் குறிப்பிட்ட அவர், விஜய் சரளமாகப் பேசுவதுடன் ஆங்கிலச் சொற்களையும் சரியாக உச்சரிப்பது மகிழ்ச்சியளிப்பதாகத் தெரிவித்துள்ளார்.

மேலும், இருமொழிக் கொள்கையை ஆதரிப்பவர்கள் அனைவரும், குறிப்பாக இளம் மாணவர்கள், தமிழ் மற்றும் ஆங்கிலம் ஆகிய இரு மொழிகளிலும் சரளமாகப் பேசவும், சொற்களைத் தெளிவாக உச்சரிக்கவும் வேண்டும் என்பதே தனது விருப்பம் எனக் கூறியுள்ளார். இதற்காக, அனைத்து பள்ளிகளிலும் தகுந்த பயிற்சி பெற்ற தமிழ் மற்றும் ஆங்கில ஆசிரியர்களை நியமிக்க வேண்டும் என்றும் அவர் வலியுறுத்தியுள்ளார். இருமொழிக் கொள்கை ஆவணங்களில் மட்டுமே இடம்பெறாமல், தமிழகம் முழுவதும் நடைமுறையில் செயல்படுத்தப்பட வேண்டும் என்றும் ப.சிதம்பரம் தனது பதிவில் தெரிவித்துள்ளார்.