கோவையில் புதிய தமிழகம் கட்சியின் தலைவர் டாக்டர் கிருஷ்ணசாமி செய்தியாளர்களை சந்தித்து பேசினார். அப்போது அவர் கூறியதாவது: த.வெ.க. ஆட்சியில் 116 நாட்களில் கொலை, கொள்ளை, பாலியல் குற்றங்கள் உள்ளிட்ட சுமார் 500 குற்றச் சம்பவங்கள் நடைபெற்றுள்ளதாக கூறப்படுகிறது. தமிழகத்தில் சட்டம்-ஒழுங்கு தொடர்பான பிரச்சினைகளும் தொடர்ந்து ஏற்பட்டு வருகின்றன. இந்த விவகாரங்கள் முதல்-அமைச்சர் விஜயின் கவனத்திற்கு சென்றுள்ளதா என்ற கேள்வி எழுகிறது. மேலும், போதைப்பொருள் பயன்பாடு இளைஞர்கள் மற்றும் மாணவர்களிடையே பெரும் பாதிப்பை ஏற்படுத்தி வருகிறது. இதை கட்டுப்படுத்த அரசு எடுக்க உள்ள உறுதியான நடவடிக்கைகள் குறித்து முதல்-அமைச்சர் விஜய் தெளிவான விளக்கம் அளிப்பார் என்று எதிர்பார்த்தோம். ஆனால், அந்த எதிர்பார்ப்பு நிறைவேறவில்லை. அமலாக்கத்துறை உள்ளிட்ட விசாரணை அமைப்புகள் தெரிவிக்கும் குற்றச்சாட்டுகள் நீதிமன்றத்தின் இறுதி தீர்ப்பாக கருதப்பட முடியாது. நீதிமன்ற விசாரணை முடிந்து தீர்ப்பு வழங்கப்பட்ட பிறகே ஒருவர் மீதான குற்றம் நிரூபிக்கப்பட்டதாகக் கருத முடியும். எனவே, விசாரணை அமைப்புகளின் குற்றச்சாட்டுகளை மட்டும் அடிப்படையாகக் கொண்டு ஒருவரை குற்றவாளி என்று முடிவு செய்வது சரியான அணுகுமுறை அல்ல.
Advertisement
எதிர்க்கட்சியினர் தவறு செய்திருப்பதற்கான ஆதாரங்கள் இருந்தால், முதல்-அமைச்சர் காவல்துறை மூலம் உரிய நடவடிக்கை எடுக்கலாம். ஒரு குற்றம் நடந்த பின்னர் வழக்குப்பதிவு செய்து கைது செய்வது மட்டும் அரசின் பொறுப்பாக இருக்க முடியாது. குற்றங்கள் நடைபெறாமல் தடுப்பதற்கான நடவடிக்கைகளை மேற்கொள்வதே அரசின் முக்கிய கடமை. முதல்-அமைச்சர் தனது பதிலுரையில் தி.மு.க.வை மட்டுமே கடுமையாக விமர்சித்துள்ளார். ஊழலை ஒழிப்பதாக கூறும் நிலையில், தி.மு.க.வை ஒழிப்பதிலேயே த.வெ.க. தனது கவனத்தை செலுத்தி வருவதாக தெரிகிறது. தமிழகத்தின் சட்டம்-ஒழுங்கு நிலை, பெண்களின் பாதுகாப்பு மற்றும் போதைப்பொருள் பிரச்சினை ஆகியவற்றுக்கு தீர்வு காண்பதில் முதல்-அமைச்சர் கவனம் செலுத்த வேண்டும். சட்டப்பேரவையில் முதல்-அமைச்சர் விஜய் ஆவேசமாக பேச வேண்டிய அவசியமில்லை. அவரது பதிலுரை சினிமா பாணியில் மட்டுமே அமைந்துள்ளது. இவ்வாறு டாக்டர் கிருஷ்ணசாமி கூறினார்.
