நாடு முழுவதும் தீபாவளி பண்டிகை நாளை உற்சாகமாகக் கொண்டாடப்பட உள்ளது. இதற்காக பொதுமக்கள் பல்வேறு ஏற்பாடுகளைச் செய்து வருகின்றனர். வெளியூர்களில் வசிப்பவர்கள் குடும்பத்தினருடன் பண்டிகையைக் கொண்டாடுவதற்காக சொந்த ஊர்களுக்குத் திரும்பி வருகின்றனர். புத்தாடைகள், பட்டாசுகள் மற்றும் இனிப்புகளை வாங்குவதற்காகக் கடைகளில் மக்கள் கூட்டம் அதிகரித்துள்ளது. இதனால் நாடு முழுவதும் தீபாவளி விற்பனை சூடுபிடித்துள்ளது. இந்நிலையில், இந்தியாவிலும் வெளிநாடுகளிலும் வசிக்கும் இந்தியர்களுக்குப் பிரதமர் நரேந்திர மோடி தீபாவளி வாழ்த்துகளைத் தெரிவித்துள்ளார். இதுதொடர்பாக அவர் வெளியிட்ட வீடியோவில் கூறியிருப்பதாவது: “மங்களகரமான தீபாவளி திருநாளில், இந்தியா மற்றும் உலகின் பல்வேறு நாடுகளில் வாழும் அனைத்து இந்தியர்களுக்கும் எனது இதயம் கனிந்த வாழ்த்துகளைத் தெரிவித்துக் கொள்கிறேன். ராவணனை வெற்றி கொண்ட பின்னர் ஸ்ரீ ராமர் அயோத்திக்குத் திரும்பியபோது மக்கள் மகிழ்ச்சியுடன் கொண்டாடினர்.
Advertisement
அப்போது நகரம் முழுவதும் வரிசையாக ஏற்றப்பட்டிருந்த அழகிய தீபங்கள் அவரை வரவேற்றன. இந்த நிகழ்வு தீபாவளியின் ஆன்மிக மற்றும் கலாசார சிறப்பையும், ராமராஜ்யத்தின் நல்வாழ்வு நிறைந்த தொடக்கத்தையும் எடுத்துரைக்கிறது. தீமையை நன்மை வெல்வதையும், துயரங்கள் நீங்கி மகிழ்ச்சியும் வளமும் நிறைந்த வாழ்க்கை மலர்வதையும் தீபாவளி உணர்த்துகிறது. இந்நாளில் நல்ல தொடக்கத்திற்காக விநாயகரையும், செல்வச் செழிப்பிற்காக மகாலட்சுமியையும் மக்கள் வழிபடுகின்றனர். அனைவரது நலனுக்காகவும் பிரார்த்தனைகள் மேற்கொள்ளப்படுகின்றன. நாட்டின் ஒவ்வொரு குடிமகனும் ஆரோக்கியம், மகிழ்ச்சி, செழிப்புடன் வாழ எனது வாழ்த்துகளைத் தெரிவித்துக் கொள்கிறேன். சுற்றுச்சூழலைப் பாதுகாப்பதிலும், சமூக நல்லிணக்கத்தைப் பேணுவதிலும், வளர்ச்சியடைந்த இந்தியாவை உருவாக்குவதிலும் நமது இளைஞர்கள் தேசப்பற்றுடன் தங்களது பங்களிப்பை வழங்க வேண்டும்.” இவ்வாறு பிரதமர் மோடி தெரிவித்துள்ளார்.
