தமிழக தேர்தல் பணியில் ஈடுபட்ட அரசு ஊழியர்களுக்கு மதிப்பூதியம்... ரூ.198 கோடி ஒதுக்கி அரசாணை வெளியீடு

2026-ம் ஆண்டு நடைபெற்ற தமிழ்நாடு சட்டமன்றப் பொதுத் தேர்தல் பணிகளில் ஈடுபட்ட அரசு அதிகாரிகள் மற்றும் ஊழியர்களுக்கு மதிப்பூதியம் வழங்க தமிழக அரசு அனுமதி அளித்துள்ளது. இதற்காக மொத்தம் ரூ.198 கோடியே 84 ஆயிரம் நிதி ஒதுக்கீடு செய்து அரசாணை வெளியிடப்பட்டுள்ளது. இதுதொடர்பான உத்தரவை தமிழக தலைமைத் தேர்தல் அதிகாரி அர்ச்சனா பட்நாயக் பிறப்பித்துள்ளார். அதன்படி, மாவட்டத் தேர்தல் அலுவலர்கள், சட்டமன்றத் தொகுதி தேர்தல் அலுவலர்கள், உதவித் தேர்தல் அலுவலர்கள், மாவட்ட வருவாய் அலுவலர் (தேர்தல்), மாவட்ட ஆட்சியர்களின் தேர்தல் பிரிவு தனிப்பட்ட உதவியாளர்கள் மற்றும் சிறப்பு வட்டாட்சியர்கள் உள்ளிட்டோருக்கு ஒரு மாத அடிப்படை ஊதியம் அல்லது அதிகபட்சமாக ரூ.45,000 வழங்கப்படும். இவற்றில் குறைவான தொகையே மதிப்பூதியமாகக் கிடைக்கும். மாநகராட்சி ஆணையர்கள், மாவட்ட வருவாய் அலுவலர்கள், தேர்தல் பணிக்கான துணை வட்டாட்சியர்கள், மண்டல அலுவலர்கள் மற்றும் தேர்தல் பார்வையாளர்களுக்கான தொடர்பு அலுவலர்களுக்கும் இதே நடைமுறை பின்பற்றப்படும். இவர்களுக்கும் ஒரு மாத அடிப்படை ஊதியம் அல்லது அதிகபட்சம் ரூ.45,000 என நிர்ணயிக்கப்பட்டுள்ளது. மாவட்டத் தேர்தல் அலுவலகங்கள், மாவட்ட வருவாய் அலுவலகங்கள், வருவாய் கோட்டாட்சியர் அலுவலகங்கள், வட்டாட்சியர் அலுவலகங்கள் மற்றும் மாநகராட்சி, நகராட்சி ஆணையர் அலுவலகங்களின் தேர்தல் பிரிவுகளில் பணியாற்றிய அலுவலர்கள் மற்றும் பணியாளர்களுக்கு ஒரு மாத அடிப்படை ஊதியம் அல்லது அதிகபட்சமாக ரூ.30,000 வழங்கப்படும். மேலும், பறக்கும் படையினர், காணொளிக் கண்காணிப்புக் குழுவினர், காணொளிப் பார்வைக் குழுவினர், கணக்குப் பதிவுக் குழுவினர், தேர்தல் நடத்தை விதிமுறைக் குழுவினர், உதவிச் செலவினக் கண்காணிப்பாளர்கள், நிலையான கண்காணிப்புக் குழுவினர் மற்றும் மண்டல உதவியாளர்களுக்கும் ஒரு மாத அடிப்படைச் சம்பளம் அல்லது அதிகபட்சம் ரூ.30,000 மதிப்பூதியமாக வழங்கப்படும்.

மாவட்ட ஆட்சியர்களின் பொது தனிப்பட்ட உதவியாளர்கள், ஒருங்கிணைப்பு அலுவலர்கள், கிராம நிர்வாக அலுவலர்கள், கிராம உதவியாளர்கள் மற்றும் ஆட்சியர் அலுவலக வருவாய்ப் பிரிவைச் சேர்ந்த பிற பணியாளர்கள் என தேர்தல் நடைமுறைகள் முழுவதிலும் பங்களித்தவர்களுக்கு ஒரு மாத அடிப்படை ஊதியத்தில் 50 சதவீதம் அல்லது அதிகபட்சமாக ரூ.20,000 வழங்கப்படும். இதில் குறைவான தொகையே கணக்கிடப்படும். இதர பணியாளர்களுக்கான மதிப்பூதிய விவரங்களும் அறிவிக்கப்பட்டுள்ளன. மாவட்டங்களில் பணிபுரியும் மூத்த நிரலாளர்கள், நிரலாளர்கள், உதவி நிரலாளர்கள் மற்றும் மாநில அளவிலான தகவல் தொழில்நுட்பப் பிரிவைச் சேர்ந்த அதிகாரிகள், பணியாளர்களுக்கு ரூ.20,000 வழங்கப்படும். தேர்தல் தரவு இயக்குநர்களுக்கு ரூ.10,000-ம், பிரிவு எழுத்தாளர்களுக்கு ரூ.7,500-ம் வழங்கப்பட உள்ளது. இந்த மதிப்பூதியத்தைக் கணக்கிடுவதற்கு 2026-ம் ஆண்டு மே 1-ம் தேதி நிலவரப்படி சம்பந்தப்பட்ட அதிகாரிகள் மற்றும் ஊழியர்களின் அடிப்படை ஊதியம் எடுத்துக்கொள்ளப்படும். குறுகிய காலம் மட்டுமே பணியாற்றியவர்கள், ஈட்டிய விடுப்பு அல்லது மருத்துவ விடுப்பு எடுத்தவர்கள் ஆகியோருக்கு அவர்கள் பணியாற்றிய காலத்தின் அடிப்படையில் விகிதாசார முறையில் தொகை வழங்கப்படும். மேலும், பொதுத் தேர்தல் வாக்குப்பதிவு நாளான 2026 மார்ச் 15 முதல் தேர்தல் அறிவிப்பு நாளான மே 4 வரை உள்ள காலகட்டம் மதிப்பூதியக் கணக்கீட்டுக்காகக் கருத்தில் கொள்ளப்படும் என அரசாணையில் தெரிவிக்கப்பட்டுள்ளது.