டெல்லியில் தலைமைத் தேர்தல் ஆணையர் ஞானேஷ் குமார் பதவி விலக வலியுறுத்தி நடைபெற்று வரும் போராட்டம் தீவிரமடைந்துள்ளது. போராட்டத்தில் பங்கேற்க வந்த கேரள முதல்வர் பினராயி விஜயன், மேற்கு வங்க முன்னாள் முதல்வர் மம்தா பானர்ஜி, டெல்லி முன்னாள் முதல்வர் அரவிந்த் கெஜ்ரிவால் உள்ளிட்ட முக்கிய தலைவர்கள் காவல்துறையினரால் கைது செய்யப்பட்டனர். இருப்பினும், ஜந்தர் மந்தர் நோக்கி இளைஞர்கள் தொடர்ந்து திரண்டு வருவதால் டெல்லியில் பரபரப்பு நிலவுகிறது. தேர்தல் ஆணையருக்கு எதிராகத் தொடர் போராட்டம் வாக்காளர் பட்டியலில் மேற்கொள்ளப்படும் சிறப்பு தீவிர திருத்தப் பணிகளில் தலைமைத் தேர்தல் ஆணையர் ஞானேஷ் குமார் ஆளுங்கட்சிக்குச் சாதகமாகச் செயல்படுவதாக காங்கிரஸ் மற்றும் இந்தியா கூட்டணிக் கட்சிகள் குற்றம்சாட்டி வருகின்றன. அவர் தனது பதவியை ராஜினாமா செய்ய வேண்டும் என்று வலியுறுத்தி, எதிர்க்கட்சிகள் தொடர்ந்து நான்காவது நாளாகப் போராட்டத்தில் ஈடுபட்டுள்ளன. இதன் தொடர்ச்சியாக, அக்டோபர் 10-ம் தேதியான இன்று டெல்லி ஜந்தர் மந்தரில் போராட்டம் நடத்தப்படும் என்று கரப்பான் பூச்சி கட்சியினர் அறிவித்திருந்தனர். பலத்த பாதுகாப்பு ஏற்பாடுகள் போராட்டத்தைக் கட்டுப்படுத்தும் நோக்கில் டெல்லி காவல்துறையினர் விரிவான பாதுகாப்பு நடவடிக்கைகளை மேற்கொண்டுள்ளனர். இதற்காக 25 ஆயிரம் போலீசார் பணியில் ஈடுபடுத்தப்பட்டுள்ளதுடன், 300 கண்காணிப்பு கேமராக்களும் அமைக்கப்பட்டுள்ளன. கைது செய்யப்படுபவர்களைத் தங்க வைப்பதற்காக மண்டபங்களும் தயார் செய்யப்பட்டுள்ளன. இந்நிலையில், போராட்டத்தில் பங்கேற்க வந்த தலைவர்களை காவல்துறையினர் வலுக்கட்டாயமாகக் கைது செய்தனர். மம்தா, கெஜ்ரிவால் உள்ளிட்டோர் கைது டெல்லி சவுத் அவென்யூ பகுதியில் திரிணாமுல் காங்கிரஸ் எம்.பி.க்களான டெரிக் ஓ பிரையன், டோலா சென் உள்ளிட்டோருடன் இணைந்து போராட்டத்தில் ஈடுபட்ட மம்தா பானர்ஜியை போலீசார் கைது செய்தனர்.
Advertisement
அதேபோல், ஜந்தர் மந்தரை நோக்கிப் பேரணியாகச் செல்ல முயன்ற டெல்லி முன்னாள் முதல்வர் அரவிந்த் கெஜ்ரிவாலையும் காவல்துறையினர் வலுக்கட்டாயமாகக் கைது செய்தனர். கேரள முதல்வர் பினராயி விஜயனும் கைது செய்யப்பட்ட தலைவர்களில் இடம்பெற்றுள்ளார். 500-க்கும் மேற்பட்டோர் கைது ஜந்தர் மந்தருக்குச் செல்லும் வழிகளில் பல்வேறு இடங்களில் திரண்டிருந்த 500-க்கும் மேற்பட்டோர் காவல்துறையினரால் கைது செய்யப்பட்டு மண்டபங்களில் அடைக்கப்பட்டுள்ளனர். போராட்டத்தில் ஈடுபட்ட சிஜேபி அமைப்பினரையும் அவர்களது ஆதரவாளர்களையும் போலீசார் தொடர்ந்து அங்கிருந்து அகற்றியும் கைது செய்தும் வருகின்றனர். அசம்பாவிதங்கள் ஏற்படுவதைத் தடுக்கும் வகையில் மத்திய டெல்லி முழுவதும் தடை உத்தரவு பிறப்பிக்கப்பட்டுள்ளது. மேலும், போராட்டத்துக்கு ஆதரவு தெரிவித்து உச்ச நீதிமன்றத்திலிருந்து ஜந்தர் மந்தர் நோக்கிப் பேரணியாகச் சென்ற வழக்கறிஞர்களும் காவல்துறையினரால் தடுத்து நிறுத்தப்பட்டனர். மாணவர் அமைப்புத் தலைவரும் கைது மாணவர் அமைப்பின் தலைவரான நேஹா போராவும் டெல்லியில் கைது செய்யப்பட்டுள்ளார். போராட்டத்தில் பங்கேற்க முயன்ற அவரைத் தடுத்து நிறுத்திய போலீசார், பின்னர் வாகனத்தில் ஏற்றிச் சென்றனர். அரசியல் கட்சியினர், மாணவர்கள் உள்ளிட்ட பல்வேறு தரப்பினரும் போராட்டத்தில் ஈடுபட முயன்று வரும் நிலையில், தொடர் கைது நடவடிக்கைகளால் டெல்லி முழுவதும் பதற்றமும் பரபரப்பும் நிலவி வருகிறது.
