2026-2027 கல்வியாண்டில் பி.எட்., எம்.எட். பட்டப் படிப்புகளில் சேர்க்கை பெற்ற மாணவர்களின் விவரங்களைப் பல்கலைக்கழக இணையதளத்தில் பதிவு செய்வதற்கான காலக்கெடு அக்டோபர் 22-ஆம் தேதி வரை நீட்டிக்கப்பட்டுள்ளது. தமிழ்நாடு ஆசிரியர் கல்வியியல் பல்கலைக்கழகத்தின் கீழ் செயல்படும் சுயநிதி இணைப்புக் கல்லூரிகளில் நடப்பு கல்வியாண்டுக்கான பி.எட்., எம்.எட். மாணவர் சேர்க்கை நடைபெற்று வருகிறது. சேர்க்கை தொடர்பான விவரங்களைப் பல்கலைக்கழகத்தின் இணையதளத்தில் பதிவேற்றம் செய்ய அக்டோபர் 6-ஆம் தேதி இறுதி நாளாக அறிவிக்கப்பட்டிருந்தது. இந்நிலையில், கல்லூரிகளில் நடைபெற்று வரும் மாணவர் சேர்க்கையின் தற்போதைய நிலவரத்தைக் கருத்தில் கொண்டு, விவரங்களைப் பதிவு செய்வதற்கான அவகாசத்தை நீட்டிக்க முடிவு செய்யப்பட்டுள்ளது.
Advertisement
இதன்படி, தகுதியான மாணவர்களின் சேர்க்கை விவரங்களை அக்டோபர் 22-ஆம் தேதி வரை இணையதளத்தில் பதிவு செய்யத் துணைவேந்தர் மற்றும் ஒருங்கிணைப்பாளர் குழு ஒப்புதல் வழங்கியுள்ளது. எனவே, தமிழ்நாடு ஆசிரியர் கல்வியியல் பல்கலைக்கழகத்தின் கீழ் இயங்கும் அனைத்து சுயநிதி இணைப்புக் கல்லூரிகளின் முதல்வர்களும், தங்கள் கல்லூரிகளில் சேர்க்கை பெற்ற தகுதியுள்ள மாணவர்களின் விவரங்களை உரிய காலக்கெடுவுக்குள் இணையதளத்தில் பதிவு செய்து சேர்க்கை நடைமுறைகளை முடிக்க வேண்டும் என அறிவுறுத்தப்பட்டுள்ளது. மேலும், அக்டோபர் 22-ஆம் தேதிக்குப் பிறகு கால அவகாசத்தை நீட்டிக்கக் கோரி சமர்ப்பிக்கப்படும் விண்ணப்பங்கள் எதுவும் பரிசீலிக்கப்படாது எனத் தமிழ்நாடு ஆசிரியர் கல்வியியல் பல்கலைக்கழகம் திட்டவட்டமாகத் தெரிவித்துள்ளது.
