சென்னை இளைஞர் கொலை: முதல்-அமைச்சர் சொல்லப்போகும் காரணம் என்ன? - டிடிவி தினகரன் கேள்வி

அமமுக பொதுச்செயலாளர் டிடிவி தினகரன், சென்னை திருவொற்றியூரில் இளைஞர் ஒருவர் கொலை செய்யப்பட்ட சம்பவம் தொடர்பாக தனது எக்ஸ் தளத்தில் கருத்து தெரிவித்துள்ளார். அதில், காவல் ஆய்வாளர் ஒருவர் தன்னை அழைத்து கொலை மிரட்டல் விடுத்ததாகவும், தன் மீது பொய் வழக்குப் பதிவு செய்து கைது செய்ய இருப்பதாகவும் இளைஞர் பிரதீப் ராஜ் பத்திரிகையாளர்கள் முன்னிலையில் தெரிவித்திருந்ததாக அவர் குறிப்பிட்டுள்ளார். இந்தப் புகாரைத் தெரிவித்த மறுநாளே பிரதீப் ராஜ் அடையாளம் தெரியாத கும்பலால் வெட்டிக் கொலை செய்யப்பட்டதாக வெளியாகியுள்ள தகவல் அதிர்ச்சி அளிப்பதாகவும் டிடிவி தினகரன் தெரிவித்துள்ளார். ஒவ்வொரு குற்றச் சம்பவத்துக்கும் வெவ்வேறு காரணங்களை முன்வைத்து வரும் முதல்-அமைச்சர் ஜோசப் விஜய், இந்த இளைஞர் கொலைக்கு என்ன காரணத்தைச் சொல்லப் போகிறார் என்றும் அவர் கேள்வி எழுப்பியுள்ளார். சட்டத்தை மதித்து நடப்போருக்கு காவல்துறை நண்பனாகவும், சட்டத்தை மீறுவோருக்கு அச்சத்தை ஏற்படுத்தும் அமைப்பாகவும் செயல்பட வேண்டும் என்று முதல்-அமைச்சர் காவல்துறையைப் பாராட்டிப் பேசியதாகவும் தினகரன் குறிப்பிட்டுள்ளார். அந்தப் பேச்சு வெளியாகி இரண்டு நாட்கள்கூட முழுமையாக முடிவடையாத நிலையில், காவல் ஆய்வாளர் ஒருவர் மிரட்டியதாக புகார் அளித்த நபர் அடுத்த நாளே கொலை செய்யப்பட்டிருப்பது பல்வேறு கேள்விகளை எழுப்புவதாகவும் தெரிவித்துள்ளார்.

காவல்துறை முதல்-அமைச்சரின் முழுமையான கட்டுப்பாட்டில் செயல்படுகிறதா என்ற சந்தேகத்தையும், இதுபோன்ற சம்பவங்கள் பொதுமக்களிடையே காவல்துறை மீதான நம்பிக்கையை பாதிக்கும் சூழலையும் உருவாக்கியுள்ளதாக தினகரன் கூறியுள்ளார். தமிழகத்தில் தவெக ஆட்சிக்கு வந்த பிறகு நடைபெறும் குற்றச் சம்பவங்களுக்கு குடும்பப் பிரச்சினை, சொத்துத் தகராறு, முன்விரோதம், பழிவாங்கும் எண்ணம் என வெவ்வேறு காரணங்கள் கூறப்பட்டு வருவதாகவும் அவர் விமர்சித்துள்ளார். அந்த வகையில், பிரதீப் ராஜ் கொலைக்கும் சட்டம்-ஒழுங்குடன் தொடர்பில்லாத ஒரு காரணம் முன்வைக்கப்படுமா என்றும் அவர் கேள்வி எழுப்பியுள்ளார். மேலும், குற்றங்கள் நடைபெற்ற பிறகு அதற்கான காரணங்களைத் தேடுவதற்குப் பதிலாக, அவை நடைபெறுவதற்கு முன்பே தடுக்கும் வகையில் காவல்துறையைச் செயல்படச் செய்ய வேண்டும் என டிடிவி தினகரன் வலியுறுத்தியுள்ளார். சட்டம்-ஒழுங்கை பாதுகாத்து, தமிழக மக்களின் பாதுகாப்பை உறுதி செய்ய முதல்-அமைச்சர் முன்வர வேண்டும் என்றும் அவர் கேட்டுக்கொண்டுள்ளார்.