பள்ளிகளில் காலை உணவு மற்றும் மதிய உணவுத் திட்டங்களை இரு வேளைகளிலும் கண்காணிக்கும் பொறுப்பை ஒரே ஆசிரியருக்கு வழங்கும் உத்தரவைத் திரும்பப் பெற வேண்டும் என தமிழ்நாடு அரசு ஊழியர்கள் ஆசிரியர்கள் நல கூட்டமைப்பு கோரிக்கை விடுத்துள்ளது. இதுதொடர்பாக பள்ளிக்கல்வித்துறை அமைச்சர் ராஜ்மோகன், அத்துறையின் செயலாளர் இன்சென்ட் திவ்யா, பள்ளிக்கல்வித்துறை இயக்குநர் லதா மற்றும் தொடக்கக்கல்வி இயக்குநர் நரேஷ் ஆகியோரிடம் கூட்டமைப்பு தனது கோரிக்கையை முன்வைத்துள்ளது. அரசு மற்றும் அரசு உதவிபெறும் பள்ளிகளில் 1 முதல் 5-ம் வகுப்பு வரை பயிலும் மாணவர்களின் நலனைக் கருத்தில் கொண்டு, கடந்த 2022-ம் ஆண்டு காலை உணவுத் திட்டம் அறிமுகப்படுத்தப்பட்டது. தொடர்ந்து செயல்படுத்தப்பட்டு வரும் இந்தத் திட்டம், தற்போது 6, 7 மற்றும் 8-ம் வகுப்பு மாணவர்களுக்கும் விரிவுபடுத்தப்பட்டுள்ளது. இதையடுத்து, பெருந்தலைவர் காமராஜர் காலை உணவுத் திட்டம் எனப் பெயரிடப்பட்ட இத்திட்டத்தை கடந்த செப்டம்பர் 22-ம் தேதி முதலமைச்சர் தொடங்கி வைத்தார்.
Advertisement
இத்திட்டத்தை முறையாகச் செயல்படுத்துவதைக் கண்காணிக்க வழிகாட்டு நெறிமுறைகள் வெளியிடப்பட்டுள்ளன. அதன்படி, பள்ளியில் பணியாற்றும் ஆசிரியர்களில் ஒருவரைச் சுழற்சி முறையில் கண்காணிப்புப் பணிக்கு நியமிக்குமாறு தலைமை ஆசிரியர்களுக்கு அறிவுறுத்தப்பட்டுள்ளது. மேலும், காலை 8.30 மணி முதல் 8.50 மணி வரை மாணவர்களுக்கு உணவு வழங்க வேண்டும் என்றும், அதற்கு முன்பாகக் கண்காணிப்புப் பணியில் இருக்கும் ஆசிரியர் உணவைச் சாப்பிட்டுப் பரிசோதித்த பின்னரே மாணவர்களுக்கு வழங்க வேண்டும் என்றும் வழிகாட்டுதலில் குறிப்பிடப்பட்டுள்ளது. இந்த நடைமுறைகள் ஆசிரியர்கள் மத்தியில் அதிருப்தியை ஏற்படுத்தியுள்ளன. இதனால், காலை மற்றும் மதிய உணவுத் திட்டங்களைக் கண்காணிக்கும் பணியை இரு வேளைகளிலும் ஒரே ஆசிரியருக்கு ஒதுக்குவது தொடர்பான அறிவிப்பைத் திரும்பப் பெற வேண்டும் என தமிழ்நாடு அரசு ஊழியர்கள் ஆசிரியர்கள் நல கூட்டமைப்பு வலியுறுத்தியுள்ளது.
