தமிழ்நாடு வீட்டு வசதி வாரியக் குடியிருப்பில் வீடு வாங்கித் தருவதாகவும், மருத்துவக் கல்லூரியில் இடம் பெற்றுத் தருவதாகவும் கூறி, பெண் ஒருவரிடம் ரூ.1.92 கோடி பணம் மற்றும் சுமார் 90 பவுன் தங்க நகைகளைப் பெற்று மோசடி செய்ததாகக் கூறப்படும் கணவன், மனைவி உட்பட 4 பேரை சென்னை மத்திய குற்றப்பிரிவு போலீசார் கைது செய்துள்ளனர். சென்னை அடையாறு பகுதியைச் சேர்ந்த கோமளவள்ளி (50) என்பவர், சென்னை மாநகர காவல் ஆணையரகத்தில் இதுதொடர்பாகப் புகார் அளித்தார். ஐபிஎஸ் அதிகாரிகளுக்கான குடியிருப்பு வளாகம் மற்றும் தமிழ்நாடு வீட்டு வசதி வாரியக் குடியிருப்பில் குறைந்த விலையில் வீடு வாங்கித் தருவதாகவும், மருத்துவக் கல்லூரியில் சீட் பெற்றுத் தருவதாகவும் கூறி சிலர் தன்னை அணுகியதாக அவர் புகாரில் தெரிவித்துள்ளார். இதை நம்பிய கோமளவள்ளி, கடந்த சில ஆண்டுகளாகப் பல்வேறு தவணைகளில் மொத்தம் ரூ.1.92 கோடி ரொக்கப் பணத்தையும், 713 கிராம் எடையுள்ள சுமார் 90 பவுன் தங்க நகைகளையும் அவர்களிடம் வழங்கியுள்ளார். ஆனால், உறுதியளித்தபடி வீடு அல்லது மருத்துவக் கல்லூரியில் இடம் பெற்றுத் தரப்படவில்லை.
Advertisement
மேலும், வாங்கிய பணத்தையும் நகைகளையும் திருப்பிக் கொடுக்காமல் அவர்கள் ஏமாற்றியதாகப் புகாரில் குறிப்பிடப்பட்டுள்ளது. இதையடுத்து, சென்னை மத்திய குற்றப்பிரிவின் நுகர்வோர் பாதுகாப்பு மற்றும் மோசடி தடுப்புப் பிரிவு போலீசார் வழக்குப் பதிவு செய்து விசாரணையைத் தொடங்கினர். தலைமறைவானவர்களைப் பிடிக்கத் தனிப்படை அமைத்து தேடுதல் வேட்டையிலும் ஈடுபட்டனர். இந்நிலையில், போலீசாரின் நடவடிக்கையைத் தொடர்ந்து செங்கல்பட்டைச் சேர்ந்த யாஸ்மீன் (32), அவரது கணவர் விவேக் (34) மற்றும் அவர்களுக்கு உடந்தையாக இருந்த தினேஷ் சவுத்ரி, தேஜராம் ஆகிய நான்கு பேரும் நேற்று (புதன்கிழமை) கைது செய்யப்பட்டனர். மோசடி செய்யப்பட்ட பணம் மற்றும் நகைகளை மீட்பதற்கான நடவடிக்கையாக, கைது செய்யப்பட்டவர்களிடம் போலீசார் தொடர்ந்து விசாரணை நடத்தி வருகின்றனர். வீடு மற்றும் மருத்துவக் கல்லூரியில் இடம் பெற்றுத் தருவதாகக் கூறி கோடிக்கணக்கில் மோசடி செய்யப்பட்டதாக எழுந்துள்ள இந்தச் சம்பவம் பரபரப்பை ஏற்படுத்தியுள்ளது.
