சென்னை மயிலாப்பூரில் ஓய்வு பெற்ற அரசு அதிகாரியின் வீட்டில் 54 சவரன் தங்க நகைகள் மற்றும் ரூ.15 லட்சம் ரொக்கப் பணத்தைத் திருடியதாக, 15 ஆண்டுகளுக்கும் மேலாக அங்கு பணியாற்றி வந்த வீட்டு பணிப்பெண் கைது செய்யப்பட்டுள்ளார். சென்னை மயிலாப்பூரைச் சேர்ந்தவர் பத்மா. ஓய்வு பெற்ற வருவாய்த்துறை அதிகாரியான இவரது வீட்டில் மணிமேகலை (53) என்பவர் கடந்த 15 ஆண்டுகளுக்கும் மேலாக வீட்டு வேலை செய்து வந்துள்ளார். நீண்டகாலமாகப் பணியாற்றியதால், பத்மாவின் குடும்பத்தினர் அவரிடம் மிகுந்த நம்பிக்கை வைத்திருந்தனர். இந்நிலையில், சமீபத்தில் பத்மாவின் வீட்டில் வைக்கப்பட்டிருந்த 54 சவரன் தங்க நகைகள் மற்றும் ரூ.15 லட்சம் ரொக்கம் திடீரென மாயமானது. இதனால் அதிர்ச்சியடைந்த பத்மா, மயிலாப்பூர் காவல் நிலையத்தில் புகார் அளித்தார். இதையடுத்து போலீசார் வழக்குப்பதிவு செய்து விசாரணையைத் தொடங்கினர். விசாரணையின் ஒரு பகுதியாக, வீட்டில் பணியாற்றி வந்த மணிமேகலையிடம் போலீசார் சந்தேகத்தின் பேரில் விசாரணை நடத்தினர்.
Advertisement
அப்போது, அவர் நகைகள் மற்றும் பணத்தைத் திருடியது தெரியவந்ததாகக் கூறப்படுகிறது. இதனைத் தொடர்ந்து மணிமேகலையை போலீசார் கைது செய்தனர். போலீசாரிடம் மணிமேகலை அளித்த வாக்குமூலத்தில், தனது கணவரின் மருத்துவச் செலவுகள் மற்றும் குடும்பத் தேவைகளுக்காகப் பலரிடம் சுமார் ரூ.24 லட்சம் கடன் பெற்றிருந்ததாகத் தெரிவித்துள்ளார். கடனைத் திருப்பிச் செலுத்துமாறு கடன் கொடுத்தவர்கள் தொடர்ந்து நெருக்கடி அளித்து வந்ததாகவும் கூறியுள்ளார். கடன் பிரச்சினையால் ஏற்பட்ட நெருக்கடியைச் சமாளிக்க முடியாமல், பல ஆண்டுகளாக வேலை செய்து வந்த பத்மாவின் வீட்டிலேயே நகைகள் மற்றும் பணத்தைத் திருடியதாக அவர் ஒப்புக்கொண்டுள்ளார். இந்தச் சம்பவம் தொடர்பாக மயிலாப்பூர் போலீசார் தொடர்ந்து விசாரணை நடத்தி வருகின்றனர். நீண்டகாலமாக நம்பிக்கையுடன் பணியாற்றி வந்த பெண்ணே, கடன் நெருக்கடியால் பெருமளவு பணம் மற்றும் நகைகளைத் திருடிய சம்பவம் அப்பகுதியில் பரபரப்பை ஏற்படுத்தியுள்ளது.
