திமுகவினர் வெறுமனே கட்சிக் கொடியை ஏந்தி நிற்பவர்கள் அல்ல; கட்சியின் கொள்கைகளைத் தங்களது வாழ்க்கையில் பின்பற்றுபவர்கள் என திமுக தலைவரும், முதலமைச்சருமான மு.க.ஸ்டாலின் தெரிவித்துள்ளார். இதுதொடர்பாக அவர் தனது எக்ஸ் (X) தளத்தில் வெளியிட்டுள்ள பதிவில் கூறியிருப்பதாவது: திமுகவினர் கொடியை மட்டும் கையில் ஏந்துபவர்கள் அல்ல; கொள்கைகளை வாழ்க்கையாகக் கொண்டு வாழ்பவர்கள் என்பதற்கு சிறந்த உதாரணமாக விளங்கும் மதிப்பிற்குரிய காசியைச் சந்தித்தேன். தந்தை பெரியாரின் கருத்துகளால் ஈர்க்கப்பட்டு, முரசொலியை அரசியல் கற்றுக்கொள்ளும் இடமாகக் கருதி, சாதி மறுப்புத் திருமணத்தை மகிழ்ச்சியுடன் ஏற்றுக்கொண்டு பெருமிதத்துடன் கொண்டாடிய அவரது கண்களில் கலைஞரின் புன்னகையைப் பார்த்தேன். கொள்கைகள் என்பவை பொதுக்கூட்ட மேடைகளில் பேசுவதற்கானவை மட்டுமல்ல; அவற்றைச் செயல்படுத்தி வாழ்ந்து காட்ட வேண்டும் என்பதை நிரூபிக்கும் காசி போன்ற லட்சக்கணக்கான தொண்டர்களை திமுக கொண்டுள்ளது.
Advertisement
தங்களது கடின உழைப்பாலும் தியாகத்தாலும் கழகத்தை வளர்த்தெடுத்த இத்தகைய தொண்டர்களின் வாழ்க்கையில் இருந்து, கட்சித் தலைவர் என்ற முறையில் தன்னையும் சேர்த்து, தலைமைப் பொறுப்பில் இருப்பவர்கள் முதல் அடிமட்டத் தொண்டர்கள் வரை, மூத்த முன்னோடிகள் முதல் புதிதாக அரசியல் களத்திற்கு வரும் இளைஞர்கள் வரை அனைவரும் கற்றுக்கொள்ள வேண்டியவை ஏராளம் உள்ளன. அன்பு நிறைந்த காசியைச் சந்தித்து வழியனுப்பிய பிறகும், அவருடன் நடத்திய உரையாடலின் நினைவுகள் தனது மனதில் தொடர்ந்து கொண்டிருப்பதாக மு.க.ஸ்டாலின் அந்தப் பதிவில் குறிப்பிட்டுள்ளார்.
