தமிழக முதல்-அமைச்சர் விஜய், வரும் நவம்பர் 2-ம் தேதி புதுக்கோட்டைக்கு வருகை தர உள்ளார். அப்போது, புதிதாகக் கட்டப்பட்டுள்ள பேருந்து நிலையம் மற்றும் உள் விளையாட்டு அரங்கத்தைத் திறந்து வைப்பதுடன், பல்வேறு நலத்திட்ட உதவிகளையும் பயனாளிகளுக்கு வழங்க உள்ளார். இதையொட்டி, மாவட்டத்தில் வரவேற்பு மற்றும் பாதுகாப்பு ஏற்பாடுகள் தீவிரமடைந்துள்ளன. புதுக்கோட்டை சத்தியமூர்த்தி சாலையில் ரூ.19 கோடி செலவில் நவீன வசதிகளுடன் புதிய பேருந்து நிலையம் அமைக்கப்பட்டுள்ளது. இதேபோல், மாவட்ட விளையாட்டு அரங்க வளாகத்தில் புதிய உள் விளையாட்டு அரங்கமும் கட்டப்பட்டுள்ளது. திறப்பு விழாவுக்காக இந்த இரு கட்டிடங்களும் தயார் நிலையில் உள்ளன. வரும் 2-ம் தேதி நடைபெறவுள்ள விழாவில் பங்கேற்கும் முதல்-அமைச்சர் விஜய், புதிய பேருந்து நிலையம் மற்றும் உள் விளையாட்டு அரங்கத்தைத் திறந்து வைத்து, தொடர்ந்து பயனாளிகளுக்கு நலத்திட்ட உதவிகளை வழங்குகிறார். இதற்காக, சென்னையில் இருந்து தனி விமானம் மூலம் திருச்சிக்கு வரும் விஜய், அங்கிருந்து ஹெலிகாப்டர் அல்லது சாலை வழியாகப் புதுக்கோட்டைக்குச் செல்லத் திட்டமிடப்பட்டுள்ளது.
Advertisement
இதற்கிடையே, முதல்-அமைச்சரின் வருகைக்கான முன்னேற்பாடுகள் குறித்து, புதுக்கோட்டை ஆயுதப்படை மைதானத்தில் அமைந்துள்ள ஹெலிகாப்டர் இறங்குதளத்தை மாவட்ட ஆட்சியர் அருணா மற்றும் மாவட்ட காவல் கண்காணிப்பாளர் ரவீந்திரகுமார் குப்தா ஆகியோர் நேரில் ஆய்வு செய்தனர். முதல்-அமைச்சருக்கு பிரமாண்ட வரவேற்பு அளிப்பதற்கான பணிகளில் தமிழக வெற்றிக் கழக நிர்வாகிகளும் தொண்டர்களும் ஈடுபட்டுள்ளனர். மேலும், புதுக்கோட்டை நகரின் முக்கிய சாலைகள் வழியாக விஜய் ரோடு ஷோ நடத்தவும் திட்டமிடப்பட்டுள்ளது. இதற்கான ஏற்பாடுகள் தொடர்பாகக் கட்சி நிர்வாகிகள் ஆலோசனை நடத்தி வருகின்றனர். விஜய்யின் வருகையை முன்னிட்டு புதுக்கோட்டை நகரம் முழுவதும் பலத்த பாதுகாப்பு ஏற்பாடுகள் மேற்கொள்ளப்பட உள்ளன. விழா நடைபெறும் இடங்கள் மற்றும் முதல்-அமைச்சர் பயணிக்கவுள்ள வழித்தடங்களில் பாதுகாப்புப் பணிகளைத் தீவிரப்படுத்தத் திட்டமிடப்பட்டுள்ளது. இதற்கிடையில், விராலிமலை சட்டமன்றத் தொகுதியில் இடைத்தேர்தல் நடைபெறவுள்ள நிலையில், முதல்-அமைச்சர் விஜய்யின் புதுக்கோட்டை வருகை அரசியல் வட்டாரத்தில் கூடுதல் கவனத்தைப் பெற்றுள்ளது.
