இசையமைப்பாளர் இளையராஜாவின் இசைக்குழுவில் பல ஆண்டுகளாகப் பணியாற்றிய புகழ்பெற்ற கிட்டார் கலைஞர் சதானந்தம் என்ற சதா மாஸ்டர் (79), உடல்நலக்குறைவு காரணமாக சென்னையில் காலமானார். அவரது மறைவு இசை உலகினரிடமும் ரசிகர்களிடமும் சோகத்தை ஏற்படுத்தியுள்ளது. மூத்த இசையமைப்பாளரும், ஏவிஎம் நிறுவனத்தின் ஆஸ்தான இசையமைப்பாளராகப் பணியாற்றியவருமான ஏவிஎம் ஆர். சுதர்சனத்தின் மகன்தான் சதானந்தம். திரையிசை உலகில் சதா மாஸ்டர் என்று அறியப்பட்ட இவர், தமிழ் திரைப்படங்களில் கிட்டார் இசைக்கு முக்கியப் பங்களிப்பு அளித்தவர். இளையராஜாவின் இசையில் வெளியான ‘அன்னக்கிளி’ திரைப்படம் தொடங்கி, சுமார் ஐந்து தசாப்தங்களாகப் பல்வேறு பாடல்களில் தனது கிட்டார் இசையால் முத்திரை பதித்துள்ளார். குறிப்பாக, ‘செந்தூரப்பூவே’ உள்ளிட்ட பிரபலமான பாடல்களில் இவரது இசை ரசிகர்களின் கவனத்தை ஈர்த்தது.
Advertisement
திரைப்படப் பாடல்களுக்கு மட்டுமின்றி, பின்னணி இசையிலும் தனது திறமையை வெளிப்படுத்திய சதா மாஸ்டர், இளையராஜாவின் இசைக்குழுவுடன் நீண்டகாலம் இணைந்து பணியாற்றினார். மேலும், பிற இசையமைப்பாளர்களின் இசைக்குழுக்களிலும் தனது பங்களிப்பை வழங்கியுள்ளார். திரைப்படங்களில் இசையமைப்புப் பணிகளுக்கு உதவியதுடன், பல்வேறு இசைக் கச்சேரிகளிலும் தொடர்ந்து கிட்டார் வாசித்து வந்தார். நீண்டகாலமாகத் தமிழ் திரையிசையில் தனது இசைப் பங்களிப்பை வழங்கிய அவரது மறைவு, இசைத் துறைக்கு ஏற்பட்ட இழப்பாகக் கருதப்படுகிறது. வயது மூப்பு மற்றும் உடல்நலக்குறைவு காரணமாக சதா மாஸ்டர் உயிரிழந்த நிலையில், அவரது மறைவுக்கு இசைக் கலைஞர்கள், திரையுலகினர் மற்றும் ரசிகர்கள் பலரும் இரங்கல் தெரிவித்து வருகின்றனர்.
