ஆசிய விளையாட்டுப் போட்டியின் 20 ஓவர் கிரிக்கெட் இறுதிப்போட்டியில் பாகிஸ்தானை 19 ரன்கள் வித்தியாசத்தில் வீழ்த்திய இந்திய அணி தங்கப் பதக்கத்தை கைப்பற்றியது. நிஷின் நகரில் உள்ள கரோகி ஸ்போர்ட்ஸ் பார்க் ஸ்டேடியத்தில் இன்று (சனிக்கிழமை) நடைபெற்ற இறுதிப்போட்டியில், நடப்பு சாம்பியனான இந்திய அணி, கேப்டன் ஸ்ரேயாஸ் அய்யர் தலைமையில் பாகிஸ்தானை எதிர்கொண்டது. டாஸ் வென்ற இந்திய கேப்டன் முதலில் பேட்டிங்கை தேர்வு செய்தார். இந்திய அணிக்கு அபிஷேக் சர்மா தொடக்கத்திலேயே அதிரடியாக ரன்கள் சேர்த்தார். இருப்பினும், சஞ்சு சாம்சன், இஷான் கிஷன், ஸ்ரேயாஸ் அய்யர் ஆகியோர் பெரிய அளவில் ரன்கள் குவிக்காமல் ஆட்டமிழந்ததால் இந்திய அணிக்கு நெருக்கடி ஏற்பட்டது. இதையடுத்து திலக் வர்மா மற்றும் சிவம் துபே இணைந்து அணியின் ஸ்கோரை உயர்த்தினர். குறிப்பாக ஆட்டத்தின் கடைசி கட்டத்தில் இருவரும் பவுண்டரி, சிக்ஸர்களை விளாசி ரன் வேகத்தை அதிகரித்தனர். திலக் வர்மா 22 பந்துகளில் 51 ரன்கள் எடுத்தார்.
Advertisement
இதன் மூலம் இந்திய அணி 20 ஓவர்கள் முடிவில் 6 விக்கெட்டுகளை இழந்து 211 ரன்கள் குவித்தது. பாகிஸ்தான் தரப்பில் அஹ்மத் டேனியல் 3 ஓவர்களில் 43 ரன்கள் விட்டுக்கொடுத்து 2 விக்கெட்டுகளையும், சைம் அயூப் 4 ஓவர்களில் 47 ரன்கள் கொடுத்து ஒரு விக்கெட்டையும் கைப்பற்றினர். இதையடுத்து 212 ரன்கள் என்ற இலக்கை நோக்கி பாகிஸ்தான் அணி களமிறங்கியது. தொடக்கத்தில் சில விக்கெட்டுகளை இழந்த அந்த அணிக்கு ஹசன் நவாஸ் மற்றும் சைம் அயூப் இணைந்து நம்பிக்கை அளித்தனர். ஹசன் நவாஸ் சிறப்பாக விளையாடி 96 ரன்கள் சேர்த்து ஆட்டமிழந்தார். எனினும், இந்திய பந்துவீச்சாளர்கள் தொடர்ந்து நெருக்கடி கொடுத்ததால் பாகிஸ்தான் அணியால் இலக்கை எட்ட முடியவில்லை. 20 ஓவர்கள் முடிவில் அந்த அணி 6 விக்கெட்டுகள் இழப்புக்கு 192 ரன்கள் மட்டுமே எடுத்தது. இதனால் இந்திய அணி 19 ரன்கள் வித்தியாசத்தில் வெற்றி பெற்று, ஆசிய விளையாட்டு கிரிக்கெட்டில் தங்கப் பதக்கத்தை வென்றது.
