2026-ஆம் ஆண்டுக்கான அமைதிக்கான நோபல் பரிசுக்குத் தென்னாப்பிரிக்காவைச் சேர்ந்த தமிழ் வம்சாவளியினரான நவநீதம் பிள்ளை தேர்வு செய்யப்பட்டுள்ளார். அமைதி மற்றும் சர்வதேச சட்டத்தின் வளர்ச்சிக்கு அவர் ஆற்றிய பங்களிப்பைப் பாராட்டி இந்த விருது அறிவிக்கப்பட்டுள்ளதாகத் தெரிவிக்கப்பட்டுள்ளது. இதையடுத்து, நவநீதம் பிள்ளைக்குத் தமிழ்நாடு முதலமைச்சர் ஜோசப் விஜய் வாழ்த்து தெரிவித்துள்ளார். மனித உரிமைகள், நீதி மற்றும் உலக அமைதிக்காகத் தொடர்ந்து குரல் கொடுத்து வரும் அவருக்கு நோபல் பரிசு அறிவிக்கப்பட்டிருப்பது உலகத் தமிழர்களுக்கு மகிழ்ச்சியும் பெருமிதமும் அளிப்பதாக முதலமைச்சர் குறிப்பிட்டுள்ளார். இதுகுறித்து அவர் வெளியிட்டுள்ள பதிவில், சர்வதேச அளவில் மனித உரிமைகள் மற்றும் உலக அமைதியை நிலைநாட்டுவதற்காகத் தொடர்ந்து பாடுபட்டு வரும் நவநீதம் பிள்ளை, 2026-ஆம் ஆண்டுக்கான அமைதிக்கான நோபல் பரிசுக்குத் தேர்வாகியிருப்பது மகிழ்ச்சியளிப்பதாகத் தெரிவித்துள்ளார்.
Advertisement
தென்னாப்பிரிக்காவில் இனவெறிக்கு எதிரான சட்டப் போராட்டத்தின் மூலம் தனது பொதுவாழ்வுப் பயணத்தைத் தொடங்கிய நவநீதம் பிள்ளை, பின்னர் அந்நாட்டின் உயர் நீதிமன்ற நீதிபதியாகவும், ஐக்கிய நாடுகள் சபையின் மனித உரிமைகள் உயர் ஆணையராகவும் பணியாற்றியுள்ளார். அமைதி மற்றும் சர்வதேச சட்டத்தை வலுப்படுத்துவதற்காக அவர் மேற்கொண்ட முயற்சிகளுக்காக இந்த அங்கீகாரம் கிடைத்திருப்பது உலகம் முழுவதும் வாழும் தமிழர்களுக்குப் பெருமை சேர்ப்பதாக முதலமைச்சர் தெரிவித்துள்ளார். மேலும், மனித உரிமைகள், சமத்துவம், நீதி மற்றும் உலக அமைதி போன்ற உயரிய கொள்கைகளை முன்னிறுத்தித் தொடர்ந்து உழைத்து வரும் நவநீதம் பிள்ளைக்கு மீண்டும் தனது மனமார்ந்த வாழ்த்துகளைத் தெரிவித்துக் கொள்வதாகவும் முதலமைச்சர் ஜோசப் விஜய் தனது பதிவில் குறிப்பிட்டுள்ளார்.
