சென்னை எண்ணூரில் தீபாவளி சீட்டு நடத்தி சுமார் ரூ.43 லட்சம் மோசடி செய்ததாகக் கூறப்படும் நபர், குடும்பத்துடன் தலைமறைவாகியுள்ளார். அவரைப் பிடிக்க போலீசார் தீவிரமாகத் தேடி வருகின்றனர். சென்னை எண்ணூர், வ.உ.சி. நகரைச் சேர்ந்தவர் ஞானப்பிரகாசம். இவரது மனைவி கல்யாணி, அதே பகுதியைச் சேர்ந்த வினோத் குமாரிடம் தீபாவளி சீட்டுக்காகத் தொடர்ந்து பணம் செலுத்தி வந்துள்ளார். மேலும், தனது உறவினர்கள் மற்றும் நண்பர்களையும் அந்தச் சீட்டில் சேர்த்துள்ளார். தீபாவளி பண்டிகை நெருங்கி வரும் நிலையில், சீட்டுக்கான தொகை மற்றும் அதற்குரிய பொருட்கள் கிடைக்கும் என கல்யாணி எதிர்பார்த்திருந்தார். ஆனால், அவருக்கு பணமோ பொருட்களோ வழங்கப்படவில்லை. இதையடுத்து, வினோத் குமாரிடம் விளக்கம் கேட்பதற்காக அவரது வீட்டிற்குச் சென்றுள்ளார்.
Advertisement
அங்கு வீடு பூட்டப்பட்டிருந்ததுடன், வினோத் குமார் தனது குடும்பத்தினருடன் தலைமறைவானதும் தெரியவந்தது. இதனால் அதிர்ச்சியடைந்த கல்யாணி, எண்ணூர் காவல் நிலையத்தில் புகார் அளித்தார். இதுகுறித்து போலீசார் மேற்கொண்ட விசாரணையில், தீபாவளி சீட்டு மூலம் சுமார் ரூ.43 லட்சம் வரை மோசடி நடைபெற்றிருப்பது தெரியவந்ததாகக் கூறப்படுகிறது. இதையடுத்து, தலைமறைவாக உள்ள வினோத் குமாரை போலீசார் தேடி வருகின்றனர். இதற்கிடையில், வினோத் குமாரிடம் தீபாவளி சீட்டுக்காகப் பணம் செலுத்திய மற்றவர்களும் இந்தச் சம்பவம் குறித்து அறிந்து அதிர்ச்சியடைந்துள்ளனர். பாதிக்கப்பட்டவர்கள் காவல் நிலையத்தில் புகார் அளித்து வரும் நிலையில், போலீசார் தொடர்ந்து விசாரணை நடத்தி வருகின்றனர்.
