திருப்பதி ஏழுமலையான் கோவிலில் பிரம்மோற்சவம் தொடக்கம்: முதல் நாளில் பெரிய சேஷ வாகன சேவை
திருப்பதி ஏழுமலையான் கோவிலில் ஆண்டுதோறும் நடைபெறும் பிரம்மோற்சவ விழா நேற்று கருட கொடியேற்றத்துடன் விமரிசையாக தொடங்கியது. விழாவின் முதல் நாளான நேற்று இரவு, பெரிய சேஷ வாகன சேவை சிறப்பாக நடைபெற்றது. இந்த ஆண்டு திருப்பதி கோவிலில் வருடாந்திர பிரம்மோற்சவம் மற்றும் நவராத்திரி பிரம்மோற்சவம் என இரண்டு பிரம்மோற்சவ விழாக்கள் நடைபெற உள்ளன. இதில் ‘சாலகட்ல’ என்று அழைக்கப்படும் வருடாந்திர பிரம்மோற்சவம் நேற்று தொடங்கியது. மாலை 6.21 மணி முதல் 6.35 மணி வரை மீன லக்னத்தில் கருட கொடியேற்ற நிகழ்ச்சி நடைபெற்றது. ஸ்ரீதேவி, பூதேவி சமேத மலையப்ப சுவாமி முன்னிலையில் வேதப் பண்டிதர்கள் வேத மந்திரங்களை முழங்கினர். பக்தர்கள் ‘கோவிந்தா’ என பக்தி கோஷம் எழுப்ப, மங்கள வாத்தியங்கள் இசைக்கப்பட்டன. இதையடுத்து பிரதான அர்ச்சகர்கள் மற்றும் கங்கணப்பட்டர் தங்கக் கொடிமரத்தில் கருடக் கொடியை ஏற்றினர். பிரம்மோற்சவ விழாவுக்கு முப்பத்து முக்கோடி தேவர்களையும், அஷ்டதிக் பாலகர்களையும் அழைக்கும் அடையாளமாக கருட கொடியேற்றம் நடைபெறுவதாக அர்ச்சகர்கள் தெரிவித்தனர். இந்த நிகழ்ச்சியில் திருமலை ஜீயர் சுவாமிகள், தேவஸ்தான அதிகாரிகள் மற்றும் ஏராளமான பக்தர்கள் பங்கேற்றனர். இதற்கு முன்பாக, ஸ்ரீதேவி, பூதேவி சமேத மலையப்ப சுவாமி, பரிவார தேவதைகளான அனந்தர், கருடர், சக்கரத்தாழ்வார் மற்றும் சேனாதிபதி ஆகியோருடன் தங்கத் திருச்சி வாகனத்தில் எழுந்தருளினார்.
