கடலூர் வண்டிப்பாளையம் மெயின் ரோட்டில் பாதாள சாக்கடை கழிவுநீர் தேங்கியதால் ஏற்பட்ட வழுக்கலில், பயணிகளுடன் சென்ற ஆட்டோ தலைகீழாகக் கவிழ்ந்து விபத்துக்குள்ளானது. இதில் 4 பேர் காயமடைந்தனர். இச்சம்பவம் அப்பகுதியில் பரபரப்பை ஏற்படுத்தியுள்ளது. கடலூர் மாநகராட்சிக்கு உட்பட்ட வண்டிப்பாளையம் பகுதியில் கடந்த சில நாட்களாகப் பாதாள சாக்கடையில் அடைப்பு ஏற்பட்டுள்ளது. இதனால் கழிவுநீர் வெளியேறி, அப்பகுதியின் பிரதான சாலையில் குளம்போல் தேங்கியுள்ளது. சாலையில் கழிவுநீர் பரவியதால் வாகனங்கள் செல்லும்போது வழுக்கும் நிலை ஏற்பட்டுள்ளது. இந்நிலையில், நேற்று திங்கள்கிழமை வண்டிப்பாளையம் மெயின் ரோட்டில் பயணிகளுடன் ஆட்டோ ஒன்று சென்று கொண்டிருந்தது. அப்போது சாலையில் தேங்கியிருந்த கழிவுநீரில் ஆட்டோவின் டயர்கள் எதிர்பாராதவிதமாக வழுக்கியதால், ஓட்டுநரின் கட்டுப்பாட்டை இழந்த வாகனம் நடுரோட்டில் தலைகீழாகக் கவிழ்ந்தது. தொடர்ந்து சில மீட்டர் தூரம் சாலையில் சறுக்கிச் சென்ற ஆட்டோவில் இருந்த பயணிகள் அலறினர். இந்த விபத்தில் ஆட்டோவில் பயணித்த 4 பேர் படுகாயமடைந்தனர்.
Advertisement
விபத்தைக் கண்ட அப்பகுதி பொதுமக்களும் வியாபாரிகளும் விரைந்து செயல்பட்டு, கவிழ்ந்த ஆட்டோவை நிமிர்த்தி உள்ளே சிக்கியிருந்தவர்களை மீட்டனர். பின்னர் காயமடைந்தவர்கள் சிகிச்சைக்காக அருகிலுள்ள அரசு மருத்துவமனைக்கு அனுப்பி வைக்கப்பட்டனர். விபத்தில் காயமடைந்தவர்கள் குறித்த விவரங்களை போலீசார் விசாரித்து வருகின்றனர். இதற்கிடையே, விபத்து தொடர்பான சிசிடிவி காட்சிகள் வெளியாகி மக்களிடையே அதிர்ச்சியை ஏற்படுத்தியுள்ளன. சாலையில் தொடர்ந்து கழிவுநீர் வழிந்தோடி விபத்து அபாயம் நிலவியபோதும், மாநகராட்சி நிர்வாகம் உரிய நடவடிக்கை எடுக்கவில்லை என அப்பகுதி மக்கள் மற்றும் சமூக ஆர்வலர்கள் குற்றம்சாட்டியுள்ளனர். எனவே, பொதுமக்களின் பாதுகாப்பைக் கருத்தில் கொண்டு, பாதாள சாக்கடை அடைப்பை உடனடியாகச் சரிசெய்து சாலையில் கழிவுநீர் தேங்குவதைத் தடுக்க மாநகராட்சி அதிகாரிகள் விரைந்து நடவடிக்கை எடுக்க வேண்டும் என அப்பகுதி மக்கள் கோரிக்கை விடுத்துள்ளனர்.
