கட்டுமானப் பணிகள் அதிகரித்து வரும் சூழலில், உற்பத்திச் செலவுகள் உயர்ந்துள்ளதால் வரும் வாரங்களில் சிமெண்ட் மூட்டையின் விலை ரூ.10 முதல் ரூ.15 வரை அதிகரிக்கக்கூடும் என 'எம்.கே. ரிசர்ச்' ஆய்வறிக்கை தெரிவித்துள்ளது. நிலக்கரி, பெட்கோக் உள்ளிட்ட எரிபொருட்களின் விலை உயர்வு மற்றும் மின்சாரம் உள்ளிட்ட உற்பத்திக்கான செலவுகள் அதிகரித்திருப்பது சிமெண்ட் தயாரிப்புச் செலவில் தாக்கத்தை ஏற்படுத்தியுள்ளது. நடப்பு நிதியாண்டின் முதல் காலாண்டில் சிமெண்ட் மூட்டைக்கு ரூ.15 வரை விலை உயர்த்தப்பட்டிருந்தது. இருப்பினும், உற்பத்திச் செலவுகள் தொடர்ந்து அதிகரித்து வருவதால், அந்த விலை உயர்வு நிறுவனங்களின் கூடுதல் செலவுகளைச் சமாளிக்கப் போதுமானதாக இல்லை என ஆய்வறிக்கையில் சுட்டிக்காட்டப்பட்டுள்ளது.
Advertisement
இதற்கிடையில், கடந்த ஜூலை மற்றும் ஆகஸ்ட் மாதங்களில் பெய்த பருவமழை காரணமாக சிமெண்ட் விலை சரிவடைந்தது. இதனால் சிமெண்ட் உற்பத்தி நிறுவனங்களின் வருவாயும் பாதிக்கப்பட்டது. இத்தகைய சவால்களுக்கு மத்தியிலும், நடப்பு நிதியாண்டின் முதல் பாதியில் சிமெண்ட் விற்பனை அளவு 7 முதல் 8 சதவீதம் வரை அதிகரிக்கும் என எதிர்பார்க்கப்படுவதாக 'எம்.கே. ரிசர்ச்' ஆய்வறிக்கையில் தெரிவிக்கப்பட்டுள்ளது.
