தூத்துக்குடி மாவட்டம், திருச்செந்தூர் நகராட்சிக்கு உட்பட்ட வீரராகவபுரம் பகுதியில் பாதாள சாக்கடை கழிவுநீர் சாலைகளில் பெருக்கெடுத்து ஓடுவதால் பொதுமக்கள் கடும் சிரமத்திற்கு ஆளாகியுள்ளனர். திருச்செந்தூர் நகராட்சியின் 13-வது வார்டில் அமைந்துள்ள வீரராகவபுரம் பகுதியில், பாதாள சாக்கடையில் ஏற்பட்ட அடைப்பு காரணமாக கடந்த சில நாட்களாகக் கழிவுநீர் வெளியேறி வருகிறது. இதனால் அப்பகுதியின் முக்கிய சாலைகளில் கழிவுநீர் தேங்கி, குளம்போல் காட்சியளிக்கிறது. மேலும், தேங்கிய கழிவுநீரால் அப்பகுதி முழுவதும் துர்நாற்றம் வீசுவதால் மக்கள் அவதியடைந்து வருகின்றனர். சுகாதாரமற்ற முறையில் சாலைகளில் தேங்கியுள்ள கழிவுநீரால் கொசுக்களின் பெருக்கம் அதிகரித்து, டெங்கு, மலேரியா உள்ளிட்ட காய்ச்சல்கள் மற்றும் தொற்றுநோய்கள் பரவும் அபாயம் இருப்பதாக அப்பகுதி மக்கள் அச்சம் தெரிவிக்கின்றனர்.
Advertisement
இதனால் பள்ளிக்குச் செல்லும் குழந்தைகள், முதியவர்கள் மற்றும் வாகன ஓட்டிகள் சாலைகளைக் கடந்து செல்வதில் பெரும் சிரமத்தைச் சந்தித்து வருகின்றனர். இந்தப் பிரச்சினை தொடர்பாக நகராட்சி நிர்வாகத்திடம் பலமுறை புகார் அளித்தும் இதுவரை உரிய நடவடிக்கை எடுக்கப்படவில்லை எனப் பொதுமக்கள் குற்றம்சாட்டுகின்றனர். எனவே, சம்பந்தப்பட்ட நகராட்சி அதிகாரிகள் உடனடியாகத் தலையிட்டு, பாதாள சாக்கடை அடைப்பை விரைந்து சரிசெய்ய வேண்டும் என்றும், கழிவுநீர் வெளியேறுவதைத் தடுத்து சாலைகளில் தேங்கியுள்ள நீரை அகற்ற வேண்டும் என்றும் வீரராகவபுரம் பகுதி மக்கள் இன்று (வெள்ளிக்கிழமை) அவசரக் கோரிக்கை விடுத்துள்ளனர்.
