கால சர்ப்ப தோஷ நிவாரணத்திற்கு சிறப்பு வாய்ந்த நாக சதுர்த்தி வழிபாடு

நாக தேவதைகளை வணங்குவதற்கான முக்கியமான நாளாக நாக சதுர்த்தி கருதப்படுகிறது. ஆடி அல்லது ஆவணி மாதங்களில் வரும் சதுர்த்தி திதியில் இந்த விழா அனுசரிக்கப்படுகிறது. மேலும், கருட பஞ்சமிக்கு முந்தைய நாளில் இந்த வழிபாடு நடைபெறுவது குறிப்பிடத்தக்கது. நாக சதுர்த்தி மற்றும் நாக வழிபாடு தொடர்பாக பல்வேறு புராணக் கதைகள் சொல்லப்படுகின்றன. காசியப முனிவருக்கும் கத்ருவுக்கும் பிறந்தவர்களே நாகர்கள் என புராணங்கள் குறிப்பிடுகின்றன. அவர்களில் ஆதிசேஷன், வாசுகி, தட்சகன், கார்கோடகன் உள்ளிட்டோர் மிகவும் புகழ்பெற்றவர்களாக கருதப்படுகின்றனர்.புராணக் குறிப்புகளின்படி, பரீட்சித் மன்னன் தட்சகனால் தீண்டப்பட்டு உயிரிழந்தார். இதனால் ஆத்திரமடைந்த அவரது மகன் ஜனமேஜயன், நாக இனத்தை முற்றிலும் அழிக்கும் நோக்கில் சர்ப்ப யாகம் நடத்தினார். அந்த யாகத்தில் ஏராளமான நாகங்கள் உயிரிழந்தன.நாக இனம் அழிவின் விளிம்பில் இருப்பதை அறிந்த ஜரத்காரு முனிவரின் மகனான ஆஸ்தீக முனிவர், யாகம் நடைபெற்ற இடத்துக்குச் சென்று ஜனமேஜயனை சமாதானப்படுத்தினார். அதன் பின்னர் யாகம் நிறுத்தப்பட்டதால் நாக குலம் காப்பாற்றப்பட்டது. இந்த நிகழ்வை நினைவுகூரும் வகையிலேயே நாக சதுர்த்தி கொண்டாடப்படுவதாக கூறப்படுகிறது.இந்த நாளில் அஷ்ட நாகங்களாக போற்றப்படும் அனந்தன் (ஆதிசேஷன்), வாசுகி, தட்சகன், கார்கோடகன், பத்மன், மகாபத்மன், சங்கன் மற்றும் குளிகன் ஆகியோரை வழிபடுவது சிறப்பாகக் கருதப்படுகிறது.ஆதிசேஷன், மகாவிஷ்ணுவின் படுக்கையாகவும் குடையாகவும் விளங்குவதுடன், பூமியைத் தாங்கும் பெருமையையும் பெற்றுள்ளார். அமிர்தத்தைப் பெறுவதற்காக தேவர்களும் அசுரர்களும் திருப்பாற்கடலைக் கடைந்தபோது வாசுகி கயிறாகப் பயன்படுத்தப்பட்டதாக புராணங்கள் கூறுகின்றன. மகாபத்மன் வடதிசையின் காவலராகவும், கார்கோடகன் சிவபெருமானின் மோதிரமாகவும் விளங்குகிறார். தட்சகன் பரீட்சித் மன்னருடன் தொடர்புடையவராகவும், சங்கன் சிவபெருமானின் சிகரத்தை அலங்கரிக்கும் சிறப்பைப் பெற்றவராகவும் போற்றப்படுகிறார்.இந்த ஆண்டு நாக சதுர்த்தி ஆகஸ்ட் 16-ஆம் தேதி ஞாயிற்றுக்கிழமை வருகிறது. அன்று அதிகாலையில் நீராடி விரதத்தைத் தொடங்குவது வழக்கம். பின்னர் அருகிலுள்ள கோவிலுக்குச் சென்று நாகப் புற்று அல்லது நாகர் சிலைகளுக்கு பால் அபிஷேகம் செய்து, மஞ்சள், குங்குமம் மற்றும் மலர்களால் அலங்கரித்து வழிபடலாம். புற்று மண்ணை பிரசாதமாக நெற்றியில் அணிந்துகொள்வதும் வழக்கமாக உள்ளது.கோவிலுக்குச் செல்ல இயலாதவர்கள் வீட்டில் இருக்கும் நாகர் சிலைக்கு பாலாபிஷேகம் செய்யலாம். சிலை இல்லாவிட்டால், அம்பாளுடன் இருக்கும் நாகர் படங்களை வைத்து மஞ்சள் மற்றும் குங்குமத்தால் அலங்கரித்து வழிபடலாம். மேலும், உளுந்து மற்றும் கொள்ளு போன்ற தானியங்களை நைவேத்தியமாகப் படைக்கலாம்.நாக வழிபாட்டால் குடும்பத்தில் நன்மைகள் அதிகரிக்கும், புத்திர பாக்கியம் கிடைக்கும், திருமணத் தடைகள் நீங்கும், செல்வ வளம் பெருகும் என்பது பக்தர்களின் நம்பிக்கையாக உள்ளது. அதேபோல், ஆலயங்களில் உள்ள நவக்கிரகங்களை வழிபட்டு, குறிப்பாக ராகு மற்றும் கேது பகவான்களுக்கு அர்ச்சனை செய்வதும் சிறந்த பலன்களைத் தரும் என்று கூறப்படுகிறது.நாக சதுர்த்தி விரதத்தை முறையாகக் கடைப்பிடிப்பதன் மூலம் தலைமுறை தோஷங்கள் நீங்கும் என்றும், சர்ப்ப தோஷம், கால சர்ப்ப தோஷம் மற்றும் ராகு-கேது தோஷங்களிலிருந்து விடுபடலாம் என்றும் நம்பப்படுகிறது. மேலும், தம்பதியரிடையே ஒற்றுமை அதிகரித்து, உடல்நலம் மேம்பட்டு, ஆரோக்கியமான வாழ்க்கை அமையும் என்றும் பக்தர்கள் கருதுகின்றனர்.