ஈரான் மீது திட்டமிடப்பட்ட தாக்குதல் ரத்து: டிரம்ப் அறிவிப்பு

அமெரிக்கா ஈரான் மீது மேற்கொள்ள திட்டமிட்டிருந்த ராணுவத் தாக்குதல் ரத்து செய்யப்பட்டுள்ளதாக அமெரிக்க முன்னாள் ஜனாதிபதி டொனால்டு டிரம்ப் அறிவித்துள்ளார். ஈரானுடன் அணுசக்தி ஒப்பந்தம் தொடர்பான பதற்றம் அதிகரித்ததைத் தொடர்ந்து, கடந்த பிப்ரவரி 28-ஆம் தேதி அமெரிக்கா மற்றும் இஸ்ரேல் இணைந்து ஈரான் மீது வான்வழித் தாக்குதல் நடத்தியதாக கூறப்பட்டது. அந்தத் தாக்குதலில் ஈரானின் உச்ச தலைவர் அயதுல்லா அலி காமேனி உயிரிழந்ததாகவும், தொடர்ந்து நடைபெற்ற தாக்குதல்களில் பெண்கள், குழந்தைகள் உள்ளிட்ட 2 ஆயிரத்திற்கும் மேற்பட்டோர் பலியானதாகவும் தகவல்கள் வெளியாகின.இதற்கு பதிலடியாக ஈரானும் தாக்குதல் நடத்தியது. அதன் விளைவாக ஹார்மூஸ் ஜலசந்தி வழியாக நடைபெறும் சரக்கு கப்பல் போக்குவரத்து கடுமையாக பாதிக்கப்பட்டது. இருப்பினும், கடந்த சில நாட்களாக அமெரிக்கா-ஈரான் இடையிலான போர் நிறுத்தம் அமலில் இருப்பதால், மத்திய கிழக்கு பிராந்தியத்தில் பதற்றம் ஓரளவு குறைந்துள்ளது.இந்நிலையில், ஜோர்டானில் அமைந்துள்ள அமெரிக்க ராணுவத் தளத்தை ஈரான் குறிவைத்து தாக்குதல் நடத்தியதாக தகவல் வெளியானது. இதையடுத்து, இந்த வார இறுதிக்குள் ஈரான் மீது தாக்குதல் நடத்த அமெரிக்க ஜனாதிபதி டொனால்டு டிரம்ப் உத்தரவிட்டுள்ளதாக வெளியான தகவல் பரபரப்பை ஏற்படுத்தியது.ஈரானை சரணடையச் செய்வதற்கான நடவடிக்கையாக இந்த ராணுவத் தாக்குதல் இருக்கும் என்றும், அந்த நாட்டின் மின்நிலையங்கள் மற்றும் பெட்ரோலிய சுத்திகரிப்பு நிலையங்கள் உள்ளிட்ட முக்கிய எரிசக்தி கட்டமைப்புகள் குறிவைக்கப்படலாம் என்றும் கூறப்பட்டது. இதனால் மேற்காசிய நாடுகளில் மீண்டும் பதற்றமான சூழல் உருவானது.ஆனால் தற்போது, ஈரான் மீது திட்டமிடப்பட்டிருந்த தாக்குதல் ரத்து செய்யப்பட்டுள்ளதாக டிரம்ப் தெரிவித்துள்ளார். மத்திய கிழக்கு நாடுகளின் வேண்டுகோளை கருத்தில் கொண்டு இந்த முடிவு எடுக்கப்பட்டதாகவும், இதன் மூலம் ஈரானுடன் விரைவில் ஒரு ஒப்பந்தம் எட்டப்படும் என்ற நம்பிக்கையையும் அவர் வெளிப்படுத்தினார்.மேலும், இந்த நடவடிக்கையால் ஹார்மூஸ் ஜலசந்தி முழுமையாக திறக்கப்படும் என்றும், ஈரானின் அணு ஆயுத அச்சுறுத்தலுக்கும் முடிவு காணப்படும் என்றும் டிரம்ப் கூறினார். போர் நிறுத்த நடவடிக்கையில் இஸ்ரேலும் இணைந்துள்ளதாக அவர் தெரிவித்த நிலையில், ஈரானுக்கு எதிரான அமெரிக்கா மற்றும் இஸ்ரேலின் தாக்குதல்கள் நிறுத்தப்படும் என எதிர்பார்க்கப்படுகிறது.