அமெரிக்க ஜனநாயக கட்சி உள்தேர்தலில் இந்திய வம்சாவளி மருத்துவர் அமிஷ் ஷா வெற்றி

அமெரிக்க நாடாளுமன்றத் தேர்தலை முன்னிட்டு நடைபெற்று வரும் ஜனநாயக கட்சியின் உள்தேர்தலில், இந்திய வம்சாவளியைச் சேர்ந்த அவசர சிகிச்சை பிரிவு மருத்துவர் அமிஷ் ஷா முக்கிய வெற்றியைப் பெற்றுள்ளார். அரிசோனா மாநிலத்தில் நடைபெற்ற இந்தத் தேர்தலில், கட்சித் தலைமையின் ஆதரவு பெற்ற வேட்பாளரை தோற்கடித்து அவர் அதிகாரப்பூர்வ வேட்பாளர் பதவியை கைப்பற்றியுள்ளார்.48 வயதான அமிஷ் ஷா, கட்சி ஆதரவு பெற்ற வேட்பாளருக்கு எதிராக களமிறங்கி வெற்றி பெற்றிருப்பது அமெரிக்க அரசியல் வட்டாரத்தில் பரவலான கவனத்தை ஈர்த்துள்ளது.குஜராத் மாநிலத்தைப் பூர்வீகமாகக் கொண்ட அவர், தேர்தல் பிரசாரத்தின் போது அரிசோனாவில் சுமார் 28 ஆயிரம் வீடுகளுக்குச் சென்று வாக்காளர்களை நேரில் சந்தித்து ஆதரவு திரட்டினார். இந்த நேரடி பிரசாரத்திற்கு பொதுமக்களிடையே நல்ல வரவேற்பு கிடைத்ததாக தகவல்கள் தெரிவிக்கின்றன.அவசர சிகிச்சை மருத்துவராக பணியாற்றி வரும் அமிஷ் ஷா, ஏழை மற்றும் நடுத்தர வர்க்க மக்களின் மருத்துவச் செலவுகளை குறைக்கும் முயற்சிகளுக்கும், இன்சுலின் உள்ளிட்ட அத்தியாவசிய மருந்துகளின் விலையை கட்டுப்படுத்த வேண்டும் என்ற கோரிக்கைக்கும் தொடர்ந்து ஆதரவு தெரிவித்து வருபவர்.வரும் நவம்பரில் நடைபெற உள்ள அமெரிக்க நாடாளுமன்றத் தேர்தலில், முன்னாள் ஜனாதிபதி டொனால்ட் டிரம்பின் ஆதரவு பெற்ற குடியரசுக் கட்சி வேட்பாளர் ஜே பீலியை எதிர்த்து அமிஷ் ஷா போட்டியிட உள்ளார். இந்தத் தேர்தல் அரிசோனா மாநிலத்தின் முக்கிய அரசியல் போட்டிகளில் ஒன்றாக இருக்கும் என எதிர்பார்க்கப்படுகிறது.