தெலுங்குத் திரையுலகின் முன்னணி நடிகரான நானி, இயக்குநர் பிரேம்குமார் இயக்கத்தில் உருவாகும் புதிய படத்தில் நடிக்க உள்ளதாகத் தகவல் வெளியாகியுள்ளது. மேலும், இப்படத்தில் அவருக்கு ஜோடியாக நடிகை ருக்மினி வசந்த் நடிக்க வாய்ப்புள்ளதாகவும் கூறப்படுகிறது. தெலுங்குத் திரையுலகில் தனக்கெனத் தனி ரசிகர் பட்டாளத்தைக் கொண்டவர் நானி. வழக்கமான கதைகளிலிருந்து மாறுபட்ட கதைகளைத் தேர்வு செய்து நடித்து வரும் இவர், தனது இயல்பான நடிப்பால் ரசிகர்களின் கவனத்தை ஈர்த்துள்ளார். இதன் காரணமாகவே அவர் ‘நேச்சுரல் ஸ்டார்’ என அழைக்கப்படுகிறார். கடந்த 2011-ம் ஆண்டு கவுதம் வாசுதேவ் மேனன் தயாரிப்பில் வெளியான ‘வெப்பம்’ திரைப்படம் மூலம் தமிழில் அறிமுகமானார் நானி. தொடர்ந்து, ராஜமவுலி இயக்கத்தில் வெளியான ‘நான் ஈ’ திரைப்படம் அவருக்கு மொழிகளைக் கடந்து ரசிகர்களைப் பெற்றுத் தந்தது. அதன்பிறகு, ‘ஷியாம் சிங்கா ராய்’, ‘அடடே சுந்தரா’, ‘தசரா’, ‘ஹாய் நான்னா’, ‘சூர்யாவின் சனிக்கிழமை’, ‘ஹிட் 3’ உள்ளிட்ட பல படங்களில் நடித்துள்ளார். வித்தியாசமான கதாபாத்திரங்களிலும் கதைக்களங்களிலும் நடித்து வரும் நானிக்கு, இந்தப் படங்கள் ரசிகர்களிடையே நல்ல வரவேற்பைப் பெற்றுத் தந்தன. சமீபத்தில் ஸ்ரீகாந்த் ஒடேலா இயக்கத்தில் அதிக எதிர்பார்ப்புகளுக்கு மத்தியில் வெளியான ‘தி பாரடைஸ்’ திரைப்படத்திலும் நானி நடித்திருந்தார்.
Advertisement
இப்படம் ரசிகர்கள் மற்றும் விமர்சகர்கள் மத்தியில் கலவையான விமர்சனங்களைப் பெற்றது. இந்தச் சூழலில், நானியின் அடுத்த படம் குறித்த புதிய தகவல் வெளியாகியுள்ளது. ‘96’, ‘மெய்யழகன்’ போன்ற உணர்வுபூர்வமான படங்களை இயக்கிய பிரேம்குமார், தனது அடுத்த படத்தில் நானியை இயக்கவுள்ளதாகத் தகவல்கள் தெரிவிக்கின்றன. எனினும், இதுகுறித்த அதிகாரப்பூர்வ அறிவிப்பு இன்னும் வெளியாகவில்லை. மேலும், இப்படத்தில் நானிக்கு ஜோடியாக ருக்மினி வசந்த் நடிக்கப் பேச்சுவார்த்தை நடைபெறுவதாகக் கூறப்படுகிறது. ‘காந்தாரா: சாப்டர் 1’ திரைப்படத்துக்குப் பிறகு இந்திய அளவில் கவனம் பெற்ற ருக்மினி வசந்த், தற்போது பல்வேறு மொழித் திரைப்படங்களில் நடித்து வருகிறார். நானி மற்றும் ருக்மினி வசந்த் முதல்முறையாக இணைந்து நடிக்கக்கூடும் என்ற தகவல் ரசிகர்கள் மத்தியில் எதிர்பார்ப்பை அதிகரித்துள்ளது. இருப்பினும், இப்படத்தின் இயக்குநர், கதாநாயகி உள்ளிட்ட விவரங்கள் குறித்து படக்குழு அதிகாரப்பூர்வமாக அறிவித்த பின்னரே இந்தத் தகவல்களின் உண்மைத் தன்மை உறுதியாகும்.
