நீட் குறித்து கருத்து தெரிவிக்க திமுகவுக்கு தகுதி இல்லை: அமைச்சர் நிர்மல்குமார் விமர்சனம்

மதுரையில் செய்தியாளர்களை சந்தித்த அமைச்சர் நிர்மல்குமார், நீட் தேர்வு தொடர்பாக அரசின் நிலைப்பாடு குறித்து விளக்கம் அளித்தார்.அவர் கூறியதாவது:“நீட் தேர்வு தேவையற்றது என்பதே எங்கள் உறுதியான நிலைப்பாடு. இந்தத் தேர்வு மாணவர்களுக்கும் அவர்களின் பெற்றோருக்கும் கூடுதல் மனஅழுத்தத்தையும் சுமையையும் ஏற்படுத்துகிறது. இதனால் எந்த நன்மையும் இல்லை என்பதை அரசு தொடர்ந்து வலியுறுத்தி வருகிறது.தமிழகத்தில் நடைபெறும் சட்டப்பூர்வமான மற்றும் அமைதியான போராட்டங்களுக்கு அரசு முழுமையான பாதுகாப்பு வழங்கி வருகிறது. தேவையான அனுமதிகளும் முறையாக வழங்கப்படுகின்றன.நீட் தேர்வு குறித்து திமுக முன்னாள் அமைச்சர்கள் தற்போது கருத்து தெரிவித்து வருகின்றனர். ஆனால், அதைப் பற்றி பேசுவதற்கான தகுதி அவர்களுக்கு இல்லை. திமுக ஆட்சிக்கு வருவதற்கு முன்பு, நீட் தேர்வை ரத்து செய்வோம் என்று மக்களுக்கு வாக்குறுதி அளித்தது. ஆனால், அந்தத் தேர்வை நீக்குவதற்கு நாடாளுமன்றத்தில் சட்டத் திருத்தம் அவசியம். மேலும், உச்சநீதிமன்றத்தின் உத்தரவுகளும் உள்ள நிலையில் அதை எவ்வாறு நிறுத்துவார்கள் என்பதை அவர்கள் விளக்கவில்லை.தவறான நம்பிக்கையை மக்களிடம் ஏற்படுத்தி இரண்டு ஆண்டுகள் அரசியல் செய்துவிட்டு, தற்போது மீண்டும் அதே விவகாரத்தில் பேசுவது பொருத்தமல்ல. திமுக முன்னாள் அமைச்சர்களோ அல்லது எம்.எல்.ஏ.க்களோ இந்த விவகாரத்தில் விமர்சிக்கத் தகுதியற்றவர்கள்.நீட் தேர்வு வேண்டாம் என்ற எங்கள் நிலைப்பாடு தெளிவானது. அதற்கான நேரம் வரும்போது, இந்தக் கோரிக்கையை முதலில் முன்வைப்பதும் நாங்கள்தான்,” என்று அமைச்சர் நிர்மல்குமார் தெரிவித்தார்.