நாக சதுர்த்தி: திருமலையில் நாளை மறுநாள் பெரிய சேஷ வாகனத்தில் மலையப்ப சுவாமி வீதியுலா

நாக சதுர்த்தியை முன்னிட்டு, திருமலை திருப்பதி ஏழுமலையான் கோவிலில் நாளை மறுநாள் (நவம்பர் 13) சிறப்பு வாகன உற்சவம் நடைபெற உள்ளது. இதில், பெரிய சேஷ வாகனத்தில் மலையப்ப சுவாமி தேவியர்களுடன் எழுந்தருளி, கோவிலின் நான்கு மாட வீதிகளிலும் உலா வந்து பக்தர்களுக்கு அருள்பாலிக்கிறார். நாக தேவதைகளை வழிபடும் வகையில் கொண்டாடப்படும் நாக சதுர்த்தியன்று, நாடு முழுவதும் உள்ள பல்வேறு கோவில்களில் சிறப்பு அபிஷேகங்கள் மற்றும் ஆராதனைகள் நடைபெறுவது வழக்கம். பக்தர்கள் நாகர் சிலைகள் மற்றும் புற்றுகளுக்குப் பால் ஊற்றி வழிபடுவதுடன், நாக தேவதைகளுக்குப் பால், பழங்கள் உள்ளிட்டவற்றையும் படைத்து பிரார்த்தனை செய்வார்கள். இதன் ஒரு பகுதியாக, திருமலை ஏழுமலையான் கோவிலில் நடைபெறும் பெரிய சேஷ வாகன சேவை மாலை 7 மணிக்குத் தொடங்கி இரவு 9 மணி வரை நடைபெறுகிறது.

ஆதிசேஷனின் அம்சமாகக் கருதப்படும் பெரிய சேஷ வாகனத்தில் உற்சவர் மலையப்ப சுவாமி, தேவியர்களுடன் எழுந்தருளி வீதியுலா வருவதை ஏராளமான பக்தர்கள் தரிசிப்பார்கள் என எதிர்பார்க்கப்படுகிறது. இந்த வாகன ஊர்வலம், இறைவனிடம் முழுமையாகச் சரணடையும் 'சரணாகதி' தத்துவத்தை எடுத்துரைக்கிறது. நாகராஜனான ஆதிசேஷன், இறைவனுக்குப் படுக்கையாகவும், ஆபரணமாகவும், குடையாகவும் இருந்து பல்வேறு வகைகளில் சேவை செய்து தனது நிலையான பக்தியையும் விசுவாசத்தையும் வெளிப்படுத்தியதாக ஐதீகம் கூறுகிறது. திருமலையில் நடைபெறும் பிரம்மோற்சவ வாகன சேவைகளில், முதன்மையான வாகனமாகப் பெரிய சேஷ வாகனம் விளங்குவது குறிப்பிடத்தக்கது.