தென் ஆப்பிரிக்கா நிர்ணயித்த 288 ரன்கள் என்ற வெற்றி இலக்கை எட்டும் முயற்சியில் ஆஸ்திரேலிய அணி அடுத்தடுத்து விக்கெட்டுகளைப் பறிகொடுத்து கடும் நெருக்கடியில் சிக்கியுள்ளது. தென் ஆப்பிரிக்கா - ஆஸ்திரேலியா அணிகள் மோதும் 3-வது மற்றும் கடைசி டெஸ்ட் கிரிக்கெட் போட்டி கேப்டவுனில் நடைபெற்று வருகிறது. இதில் முதலில் பேட்டிங் செய்த தென் ஆப்பிரிக்க அணி 329 ரன்கள் எடுத்தது. இதையடுத்து களமிறங்கிய ஆஸ்திரேலிய அணி தனது முதல் இன்னிங்சில் 429 ரன்கள் குவித்தது. இதன் மூலம் 100 ரன்கள் பின்தங்கிய நிலையில் தென் ஆப்பிரிக்க அணி 2-வது இன்னிங்சைத் தொடங்கியது. இரண்டாவது இன்னிங்சில் 4 விக்கெட்டுகளை இழந்து 140 ரன்களுடன் தடுமாறிய தென் ஆப்பிரிக்க அணிக்கு ரையான் ரிக்கெல்டன், வியான் முல்டர் ஜோடி நம்பிக்கையளித்தது. 6-வது விக்கெட்டுக்கு கைகோர்த்த இருவரும் ஆஸ்திரேலிய பந்துவீச்சை திறம்பட எதிர்கொண்டு ரன்களைக் குவித்தனர். சிறப்பான ஆட்டத்தை வெளிப்படுத்திய ரிக்கெல்டன் 219 பந்துகளில் 101 ரன்கள் எடுத்த நிலையில் ரன் அவுட் ஆனார். தொடர்ந்து பொறுப்புடன் விளையாடிய முல்டர் 221 பந்துகளைச் சந்தித்து 115 ரன்கள் சேர்த்தார். இந்த ஜோடியின் சிறப்பான ஆட்டத்தால் தென் ஆப்பிரிக்க அணி 2-வது இன்னிங்சில் 134.4 ஓவர்களில் 387 ரன்கள் எடுத்து அனைத்து விக்கெட்டுகளையும் இழந்தது.
Advertisement
இதையடுத்து ஆஸ்திரேலிய அணியின் வெற்றிக்கு 288 ரன்கள் இலக்காக நிர்ணயிக்கப்பட்டது. போட்டியின் கடைசி நாளான இன்று இலக்கை நோக்கி களமிறங்கிய ஆஸ்திரேலிய அணிக்கு ஆரம்பமே அதிர்ச்சியாக அமைந்தது. தென் ஆப்பிரிக்க வேகப்பந்து வீச்சாளர் காகிசோ ரபாடா தனது துல்லியமான பந்துவீச்சால் அடுத்தடுத்து விக்கெட்டுகளை வீழ்த்தி ஆஸ்திரேலிய அணியை நிலைகுலையச் செய்தார். தொடக்க வீரர் மாட் ரென்ஷா ரன் கணக்கைத் தொடங்காமலேயே ஆட்டமிழந்தார். மார்னஸ் லபுஷேன் 4 ரன்களிலும், டிராவிஸ் ஹெட் 14 ரன்களிலும் வெளியேறினர். தொடர்ந்து வந்த வீரர்களாலும் நிலைத்து நின்று ரன்கள் சேர்க்க முடியவில்லை. இதனால் 20 ஓவர்கள் நிறைவில் ஆஸ்திரேலிய அணி வெறும் 46 ரன்களுக்கே 6 விக்கெட்டுகளை இழந்து பரிதாபமான நிலையில் உள்ளது. தொடரின் முடிவைத் தீர்மானிக்கும் இந்தக் கடைசி டெஸ்ட் போட்டியில் ஆஸ்திரேலியா இந்த இக்கட்டான சூழலில் இருந்து மீண்டு வருமா அல்லது தென் ஆப்பிரிக்க அணி வெற்றியைத் தனதாக்குமா என்ற எதிர்பார்ப்பு ரசிகர்களிடையே அதிகரித்துள்ளது.
